गुढीपाडव्यापासून ‘श्री रामदेव तासगाव’ यांच्या ‘श्री रामोत्सव २०२५’चा प्रारंभ !

‘श्री राम उत्सवा’चे यंदा १९१ वे वर्ष !

तासगाव (जिल्हा सांगली), २६ मार्च (वार्ता.) – गुढीपाडवा म्हणजेच ३० मार्चपासून ‘श्री रामदेव तासगाव’ यांचा ‘श्री रामोत्सव २०२५’ चालू होत असून ९ एप्रिलपर्यंत विविध कार्यक्रमांचे आयोजन करण्यात आले आहे. वर्ष १८३५ मध्ये प्रारंभ झालेल्या उत्सवाचे यंदा १९१ वे वर्ष आहे. या उत्सवात प्रतिदिन पहाटे ५.३० वाजता काकड आरती, सकाळी ६ वाजता प्रभातफेरी, सकाळी ७ वाजता महापूजा, दुपारी १२.१५ वाजता महानैवेद्य, रात्री ७.१५ वाजता श्रीरामाला फराळाचा नैवेद्य, तसेच रात्री ७.३० वाजता करुणाष्टके, सवाया, श्रीरामरक्षा असे नित्य कार्यक्रम होतील. हे सर्व कार्यक्रम सिद्धेश्वर रस्ता येथील श्रीराममंदिरात होणार असून ३० मार्च म्हणजे गुढीपाडव्याला एप्रिलला सायंकाळी ५ ते ६.३० या वेळेत ‘श्रीराम शोभायात्रा’ होईल.

६ एप्रिलला जन्मकाळ आणि श्रीरामनवमीचे कीर्तन !

प्रतिदिन ३० मार्च ते ५ एप्रिलपर्यंत रात्री ९.३० वाजता पुणे येथील ह.भ.प. हर्षदबुवा जोगळेकर यांचे सुश्राव्य कीर्तन होईल. दुपारी भजन, सायंकाळी ६ ते ७ प्रवचन असे कार्यक्रम होणार आहेत. ६ एप्रिल म्हणजे श्रीरामनवमीच्या दिवशी सकाळी १० वाजता जन्मकाळ कीर्तन होईल, तर दुपारी १२.३० वाजता श्रींचा जन्मकाळ होईल.

७ एप्रिल या दिवशी सकाळी १०.३० ते दुपारी २ या वेळेत महाप्रसाद होणार आहे. ८ एप्रिल या दिवशी सायंकाळी ६ ते ७ वसंतपूजा आणि रात्री ९ वाजता स्वराभिषेक कार्यक्रम, तर ९ एप्रिलला सायंकाळी ६ वाजता लळीत अन् गोपाळकाला कीर्तन होईल. तरी अधिकाधिक भाविकांनी याचा लाभ घ्यावा, असे आवाहन संयोजकांच्या वतीने करण्यात आले आहे.

गेल्या ४६ वर्षांपासून अधिक काळ चालू असलेली प्रभातफेरी !

गेल्या ४६ वर्षांपासून श्री रामोत्सवाच्या वेळी प्रतिदिन सकाळी ६ ते ७ या वेळेत ‘जनजागृती प्रभातफेरी’ तासगाव शहरातील विविध भागांतून काढण्यात येते. यात सर्व प्रकारे धान्य अर्पण घेण्यात येते, जे प्रामुख्याने उत्सव समाप्तीच्या काळात जो महाप्रसाद होतो, त्यासाठी वापरण्यात येते.