गोव्यात ८ डिसेंबरपासून ब्रिटनमधून ९०० प्रवासी आले. यांपैकी ४२५ जणांची आतापर्यंत कोरोनाशी संबंधित चाचणी करण्यात आली. यांपैकी १६ प्रवासी कोरोनाबाधित आढळले आहेत. या १६ प्रवाशांचे कोरोनाशी संबंधित नमुने ‘जिनॉमिक’ चाचणीसाठी पुणे येथील प्रयोगशाळेत पाठवण्यात येणार आहेत.

उसगाव, फोंडा येथील गोव्यातील एकमेव गोवा मांस प्रकल्प शासन चालू करण्याच्या सिद्धतेत आहे. हा प्रकल्प आम्ही कधीही चालू करू शकतो, अशी माहिती गोवा मांस प्रकल्पाचे महासंचालक प्रभुगावकर यांनी २ दिवसांपूर्वी प्रसारमाध्यमांना दिली.

नजिकच्या काळात मंत्रीमंडळात फेरपालट करण्यात येणार नाही, असे मत मुख्यमंत्री डॉ. प्रमोद सावंत यांनी व्यक्त केले. मंत्रीमंडळात फेरपालट होणार, अशा प्रसारमाध्यमातून प्रसिद्ध होत असलेल्या वृत्तांना अनुसरून मुख्यमंत्री डॉ. प्रमोद सावंत यांनी स्पष्टीकरण दिले.