विधान परिषदेच्या सभापतींविरोधातील अविश्वास प्रस्ताव विरोधकांकडून मागे !

मुंबई, २७ मार्च (वार्ता.) – महाराष्ट्र विधान परिषदेचे सभापती प्रा. राम शिंदे यांच्या विरोधात विरोधकांनी प्रविष्ट केलेला अविश्वास प्रस्ताव मागे घेण्यात आला आहे. विधान परिषदेचे विरोधी पक्षनेते अंबादास दानवे यांनी याविषयीचे पत्र २६ मार्च या दिवशी सभापतींना सादर केले. या पत्रावर दानवे यांच्यासह विधान परिषदेतील सदस्य एकनाथ खडसे, अनिल परब, भाई जगताप, अभिजित वंजारी, सचिन अहिर, सुनील शिंदे, राजेश राठोड, प्रज्ञा सातव, जगन्नाथ अभ्यंकर यांच्या स्वाक्षर्‍या आहेत.

‘महाराष्ट्र विधान परिषदेचे विरोधी पक्ष नेते आणि सदस्य यांचा हक्क अबाधित राखला जात नसल्याने सार्वभौम सभागृहाची प्रतिष्ठा राखली जावी, यासाठी १९ मार्च २०२५ च्या सूचनेद्वारे आम्ही सभापतींना पदावरून दूर करण्याविषयीचा प्रस्ताव सादर केला होता; मात्र २१ मार्च या दिवशी मुख्यमंत्री देवेंद्र फडणवीस आणि सभागृहाचे नेते उपमुख्यमंत्री एकनाथ शिंदे यांच्याशी झालेल्या सविस्तर चर्चेच्या अनुषंगाने उपरोक्त सर्व सूत्रांवर मुख्यमंत्र्यांनी समाधानकारकरित्या आश्वस्त केले आहे. सभागृहात खेळीमेळीचे वातावरण रहावे आणि लोकशाहीच्या पवित्र मंदिराचा सन्मान राखला जावा; म्हणून आम्ही सभापतींना पदावरून दूर करण्यासंबंधी दिलेली प्रस्तावाची सूचना मागे घेत आहोत’, असे पत्रात नमूद केले आहे.