बांधकाम अनुमतीसाठी ५ लाख रुपयांची लाच स्वीकारतांना तिघांना रंगेहात पकडले !

कराड – तक्रारदार यांच्याकडे बांधकामास अनुमती देण्यासाठी १० लाख रुपयांची लाचेची मागणी करण्यात आली होती. यापैकी ५ लाख रुपयांचा पहिला हप्ता स्वीकारतांना कराड नगरपालिकेचे साहाय्यक नगररचनाकार यांच्यासह दोघांना सातारा लाचलुचपत प्रतिबंधक विभागाने रंगेहात पकडले. या प्रकरणी कराडचे तत्कालीन मुख्याधिकारी शंकर खंदारे यांच्यासह चौघांवर गुन्हा नोंद करण्यात आला आहे.

तक्रारदार यांचे कराड शहरात ५ मजली इमारतीचे काम प्रस्तावित आहे. वर्ष २०१७ मध्ये तक्रारदार यांनी कराड नगरपालिकेमध्ये अर्ज केला होता. सुधारित बांधकाम अनुमती मिळण्यासाठी वर्ष २०१९ मध्ये पुन्हा अर्ज करण्यात आला होता. स्थानांतर झालेले तत्कालीन कराड नगरपालिकेचे मुख्याधिकारी शंकर खंदारे, साहाय्यक नगररचनाकार स्वानंद शरगुप्पे, पालिका कर्मचारी तौफिक शेख आणि खासगी व्यक्ती अजिंक्य देव यांनी संगनमत करून तक्रारदार यांच्याकडे बांधकाम अनुमतीसाठी १० लाख रुपयांची लाच मागितली. तक्रारदार यांनी याविषयी सातारा लाचलुचपत प्रतिबंधक विभागाशी संपर्क साधला. लाचलुचपत प्रतिबंधक विभागाने घटनेची माहिती घेऊन अन्वेषण केले असता यामध्ये तथ्य आढळून आले. यानंतर २४ मार्च या दिवशी सापळा रचून लाचलुचपत प्रतिबंधक विभागाने साहाय्यक नगररचनाकार शिरगुप्पे पालिका कर्मचारी तौफिक शेख आणि खाजगी व्यक्ती अजिंक्य देव यांना ५ लाख रुपयांची लाच स्वीकारतांना रंगेहात पकडले.