श्रीलंकेचे ज्येष्ठ नेते दिनेश गुणवर्धने यांची पंतप्रधान म्हणून नियुक्ती करण्यात आली. नवनिर्वाचित राष्ट्रपती रानिल विक्रमसिंघे यांनी त्यांना पद आणि गोपनीयता यांची शपथ दिली.

गंभीर आर्थिक आणि राजकीय संकट यांचा सामना करणार्‍या श्रीलंकेला येत्या ७ दिवसांच्या आत नवा राष्ट्रपती मिळेल. संसदेचे सभापती यापा अभयवर्धने यांनी १५ जुलै या दिवशी याची घोषणा केली. राष्ट्रपती गोटाबाया राजपक्षे यांनी पदाचे त्यागपत्र दिल्याचेही त्यांनी स्पष्ट केले.

श्रीलंकेचे राष्ट्रपती गोटाबाया राजपक्षे यांना मालदीवने शरण दिल्यानंतर मालदीवमध्ये राष्ट्रपती इब्राहिम सालेह यांच्या निवासस्थानाबाहेर निदर्शने करण्यात येत आहेत. राजपक्षे यांना पुन्हा श्रीलंकेत पाठवून देण्याची मागणी जनतेकडून केली जात आहे. सूत्रांनी दिलेल्या माहितीनुसार राजपक्षे सिंगापूर येथे जाण्याची शक्यता आहे.