प.पू. भक्तराज महाराज यांच्‍या महानिर्वाणदिनाच्‍या निमित्ताने कांदळी (जिल्‍हा पुणे) येथील आश्रमात विशेष कार्यक्रम !

जुन्‍नर (जिल्हा पुणे), २३ नोव्हेंबर (वार्ता) – प्रतिवर्षीप्रमाणे या वर्षीही इंदूर (मध्यप्रदेश) येथील थोर संत आणि सनातनचे श्रद्धास्‍थान प.पू. भक्तराज महाराज यांचा महानिर्वाणदिन २४ नोव्‍हेंबर म्‍हणजे कार्तिक कृष्‍ण नवमी या दिवशी आहे. या निमित्ताने श्री रामचंद्र देव ट्रस्‍ट एवं प.पू. भक्तराज महाराज समाधी ट्रस्‍ट यांच्‍या वतीने पुणे जिल्‍ह्यातील जुन्‍नर तालुक्‍यातील कांदळी येथील आश्रमात २३ नोव्‍हेंबर या दिवशी विशेष कार्यक्रमांचे आयोजन करण्‍यात आले होते.

२३ नोव्‍हेंबर या दिवशी झालेले कार्यक्रम !

२३ नोव्‍हेंबर या दिवशी सकाळी ९ ते ११ या कालावधीत प.पू. भक्तराज महाराज यांच्‍या समाधीची नित्‍य नैमित्तिक पूजा करण्यात आली. त्‍यानंतर महाप्रसाद झाला. दुपारी ३ ते सायंकाळी ७ या कालावधीत प.पू. भक्तराज महाराज यांच्‍या पादुकांची मिरवणूक काढण्यात आली. रात्री ७.३० ते ८ या कालावधीत प.पू. भक्तराज महाराज यांच्या समाधीची नित्य नैमित्तिक आरती करण्यात आली. रात्री ह.भ.प. चैतन्‍य दिवाकर सहस्रबुद्धे यांचे ‘सद्‍गुरु भक्ती’ या विषयावर कीर्तन आयोजित करण्यात आले होते. त्यानंतर प.पू. भक्तराज महाराज लिखित भजनांचा कार्यक्रम झाला, तसेच कु. देविका पाटील आणि कु. मंजिरी पाटील यांनी ‘विठ्ठल आराधना’ आणि ‘दत्ताची पालखी’ हे भजन सादर केले. त्‍यानंतर प.पू. भक्तराज महाराज लिखित भजनांचा कार्यक्रम झाला. २४ नोव्‍हेंबर या दिवशीही कार्यक्रम होणार आहेत.