राष्ट्राभिमानी आणि परात्पर गुरु डॉ. आठवले यांच्याप्रती भाव असणारा ६१ टक्के आध्यात्मिक पातळी गाठलेला उच्च स्वर्गलोकातून पृथ्वीवर जन्माला आलेला वाशी (नवी मुंबई) येथील कु. आदिश विश्‍वनाथ गौडा (वय ७ वर्षे) !

उच्च लोकातून पृथ्वीवर जन्माला आलेली दैवी (सात्त्विक) बालके म्हणजे पुढे हिंदु राष्ट्र (सनातन धर्म राज्य) चालवणारी पिढी ! या पिढीतील कु. आदिश गौडा हा आहे !

(वर्ष २०१७ मध्ये कु. आदिश याची आध्यात्मिक पातळी ५३ टक्के होती.- संकलक)

कु. आदिश गौडा (वय ७ वर्षे) याने २१ ऑक्टोबर २०२० या दिवशी ६१ टक्के आध्यात्मिक पातळी गाठल्याचे घोषित करण्यात आले. त्यानिमित्ताने त्याची आई सौ. चंचलाक्षी गौडा यांना जाणवलेली त्याची गुणवैशिष्ट्ये पुढे देत आहोत.

१. प.पू. रामदेवबाबा यांचा योगासनाचा कार्यक्रम पाहिल्यावर स्वतः योगासने करण्याचा प्रयत्न करणे

‘एकदा दूरदर्शनवर प.पू. रामदेवबाबा यांचा योगासने शिकवण्याचा कार्यक्रम प्रसारित होत होता. त्यानंतर कु. आदिश स्वतः योगासने करण्याचा प्रयत्न करू लागला. नामजपाला बसतांनासुद्धा तो पद्मासनात बसून नामजप करण्याचा प्रयत्न करतो.

२. प्रसिद्धीची आवड नसणे

तो नामजप करत असतांना मी भ्रमणभाषवर त्याचे चित्रीकरण करण्याचा प्रयत्न करत होते. मध्येच त्याने डोळे उघडले आणि मी चित्रीकरण करत असल्याचे त्याच्या लक्षात आले. तो मला म्हणाला, ‘‘आई, भ्रमणभाषवर काय करत आहेस ? त्यापेक्षा तू नामजप कर.’’ मी भ्रमणभाष बाजूला ठेवल्यावर तो नामजप करू लागला. कधी कधी तो खोलीत एकटाच बसून नामजप करतो.

३. राष्ट्राभिमान असणे

३ अ. चिनी ‘अ‍ॅप’विषयी प्रबोधन करणे : एकदा तो दूरदर्शनवर बातम्या पहात होता. ‘Tik-Tok’  app हे चिनी ‘अ‍ॅप’ असल्याने त्यामुळे आपली हानी होते’, ही वार्ता त्याने पाहिली. त्यानंतर आमच्या घराजवळ रहाणार्‍या एका ताईला त्याने सांगितले, ‘‘दीदी तुम्ही Tik-Tok वापरता, ते चांगले नाही. ते चिनी अ‍ॅप आहे. तुम्ही ते बंद करा.’’ तो अशा प्रकारचे प्रबोधन नेहमी करतो.

३ आ. सर्वांना विदेशी वस्तूंऐवजी स्वदेशी वस्तू वापरण्यास सांगणे : एकदा आदिशने भ्रमणभाषवर स्वदेशी आणि विदेशी वस्तू यांची माहिती असलेला ‘व्हिडिओ’ पाहिला. तेव्हा ‘आपण स्वदेशी वस्तूच  वापरायला हव्यात’, हे त्याच्या लक्षात आले. त्यानंतर ‘आमच्या घरातील सर्व साहित्यामध्ये काही विदेशी साहित्य आहे का ?’, हे तो पडताळून पहात होता. दुकानदारांनाही तो ‘‘विदेशी वस्तू घेऊ नका, स्वदेशी आणा. विदेशी साहित्य चांगले नाही’’, असे सांगत होता.

४. भ्रमणभाषवर खेळ खेळण्यापेक्षा सायकल चालवणे अधिक आवडणे

आदिशला भ्रमणभाषवर खेळ खेळण्यापेक्षा सायकल चालवणे, धनुष्यबाण आणि अन्य शारीरिक खेळ आवडतात. वर्गात छत्रपती शिवाजी महाराज यांच्याविषयी माहिती मिळाल्यावर ‘मलाही लाकडी तलवार हवी आहे’, असे त्याने सांगितले.

५. परात्पर गुरु डॉक्टरांप्रतीचा भाव

५ अ. दुकानदाराने दिलेल्या खाऊच्या कागदावर परात्पर गुरु डॉ. आठवले यांचे छायाचित्र पाहून ते नीट कापून देवघरात चिकटवणे : एकदा आदिश आमच्या घराच्या बाजूला असणार्‍या दुकानातून खाऊ आणून खात होता. त्या दुकानदाराने तो खाऊ सनातन पंचांगाच्या कागदात बांधून दिला होता. त्या कागदावर आदिशला परात्पर गुरु डॉक्टरांचे छायाचित्र (भावचित्र) दिसले. तो त्या कागदाचा चुरगळलेला भाग नीट करत होता. मी त्याला विचारले, ‘‘हे तू काय करत आहेस ?’’ त्याने सांगितले, ‘‘आई, या कागदावर स्वामी तातांचे छायाचित्र आहे.’’ (आदिश परात्पर गुरु डॉ. आठवले यांना ‘स्वामी ताता’, असे संबोधतो. कन्नड मध्ये आजोबांना ‘ताता’ म्हणतात.) त्याने ते छायाचित्र नीट कापून देवघरातील देवतांच्या चित्रांच्या बाजूला चिकटवून ठेवले.

५ आ. स्वतः नामजप करत असल्याचे परात्पर गुरु डॉक्टरांना सांगण्यास सांगणे : कधी कधी आमच्या घरी साधक येतात. तेव्हा तो विचारतो, ‘‘आई, हे कशासाठी आले आहेत ?’’ तेव्हा ‘‘स्वामी तातांंनी तुझी आठवण काढली आहे आणि ‘तू नामजप करतोस कि नाही’, हे पहाण्यासाठी साधकांना पाठवले आहे’’, असे मी त्याला सांगतेे. नंतर तो नामजप करतो आणि ‘‘मी नामजप करतो, हे स्वामी तातांना सांग’’, असे सांगतो.

६. चि. आदिशमधील स्वभावदोष

हट्टीपणा, राग येणे आणि वडिलांचे दोष पाहून चिडचिड करणे

‘हे गुरुदेवा, तुमच्याच कृपेमुळे आम्हाला उच्च लोकातील हा जीव मुलगा म्हणून लाभला आहे. त्याचे योग्य पालनपोषण आणि त्याच्यावर चांगले संस्कार करण्यासाठी तुम्हीच आमच्याकडून प्रयत्न करवून घ्या’, अशी आपल्या चरणी प्रार्थना आहे.’

– सौ. चंचलाक्षी विश्‍वनाथ गौडा (आदिशची आई), वाशी, नवी मुंबई. (२८.५.२०२०)