सातारा येथील गणपति मंदिराच्या प्रदक्षिणा मार्गावर मुसलमान महिलेकडून नमाजपठण !

सातारा, २४ मार्च (वार्ता.) – येथील फुटका तलावातील श्री गणेश मंदिराच्या प्रदक्षिणा मार्गावर एका मुसलमान महिलेने नमाजपठण केल्याची घटना घडली आहे. यामुळे संबंधित महिलेवर कडक कायदेशीर कारवाई करण्याची मागणी स्थानिक नागरिकांतून होत आहे. ही घटना १३ मार्चच्या सायंकाळी ७ वाजता घडली. ही महिला कोण होती ? असे करण्यामागील तिचा उद्देश काय होता ? असे प्रश्न स्थानिक नागरिकांना पडले आहेत, तसेच अशा प्रकारच्या घटनांमुळे समाजातील जाती-जातींमध्ये तेढ निर्माण होऊन सामाजिक सलोखा आणि शांतता बिघडू शकते. कायदा आणि सुव्यवस्थेचा प्रश्नही निर्माण होऊ शकतो. त्यामुळे सातारा पोलिसांनी या घटनेची सखोल चौकशी करून दोषी महिलेवर कडक कायदेशीर कारवाई करावी, अशी मागणी हिंदुत्वनिष्ठांनी केली आहे.

याविषयी विश्व हिंदु परिषदेचे सातारा जिल्हाध्यक्ष विजय गाडवे यांनी सातारा जिल्हाधिकार्‍यांना निवेदन दिले आहे. यामध्ये त्यांनी सातारा पोलिसांना ‘संशयित महिलेची चौकशी करण्याचे आदेश द्यावेत’, अशी मागणी केली आहे.