भारतमातेची आरती

आज ‘प्रजासत्ताकदिन’ (तिथीनुसार) आहे. त्या निमित्ताने…

जय देवी जय देवी जय भारतमाते
तव चरणी जनता ही नतमस्तक होते ।। धृ. ।।

भाग्यवान जन्माला, आलो मी येथे ।
माणुसकीच्या धर्मा, जनता ही जपते ।।

धर्म-जाती प्रेमाने, नांदती या येथे ।
तव गुण वर्णन करता, मन तल्लीन होते ।। १ ।।

कितीतरी वीर शूर होऊनिया गेले ।
कितीतरी राष्ट्रभक्त, हुतात्मा येथे झाले ।।

छत्रपती शिवबाने अन्याया संपवले ।
झाशीच्या राणीचे शौर्य विश्व गाते ।। २ ।।

कविता टागोरांची जगद्वंद्य ठरते ।
सूर लता आशाचे, जगास मोहवते ।।

संगीत योगा जगास, आनंदही देते ।
कुष्ठरोगी सेवा करती बाबा आमटे ।। ३ ।।

गुण गाता तव माते, भाषाही थकते ।
जग हे सारे माते, पूजन तव करते ।।
राष्ट्रप्रेम जनतेच्या, हृदयी धगधगते ।
लवून करतो सलाम, तुजला मी माते ।। ४ ।।

चालीरिती किती बोली, सामावून घेते ।
विविधता असूनही, एकतेस जपते ।।
संकट येता रक्षण करीन मी माते ।
सारे माझे जीवन, अर्पिन मी माते ।। ५ ।।

– (पू.) किरण फाटक, शास्त्रीय गायक, डोंबिवली. (२४.१.२०२५)