वांद्रे (पू.) जागेवर राज्याचे नवीन ‘महापुराभिलेख भवन’ बांधणार ! – मंत्री अधिवक्ता आशिष शेलार

मुंबई – पुराभिलेख संचालनालयामध्ये उपलब्ध दुर्मिळ ऐतिहासिक कागदपत्रांचा हा राष्ट्रीय महत्त्वाचा ठेवा सुरक्षित ठेवण्याच्या दृष्टीने पुराभिलेख संचालनालयाच्या वांद्रे (पू.) येथील ६ सहस्र ६९१ चौ.मी. जागेवर राज्याचे नवीन ‘महापुराभिलेख भवन’ बांधण्यात येणार आहे. तापमान आणि आर्द्रता नियंत्रित अभिलेख कक्ष, स्वतंत्र बांधणी शाखा, प्रतिचित्रण शाखा, देशविदेशातून येणार्‍या इतिहास संशोधकांसाठी अत्याधुनिक संशोधन कक्ष, स्वतंत्र प्रदर्शन दालन अशा अनेक सोयीसुविधांनी युक्त अशी ही इमारत असेल, असे अधिवक्ता आशिष शेलार यांनी घोषित केले.

मंत्री अधिवक्ता आशिष शेलार यांनी विधानसभेत केलेल्या निवेदनात म्हटले आहे की, महाराष्ट्र शासनाच्या सांस्कृतिक कार्य विभागांतर्गत पुराभिलेख संचालनालय हा विभाग असून पुराभिलेख संचालनालयाचे मुख्यालय मुंबई येथे असून पुराभिलेख विभागाकडे असलेल्या १७ कोटी ५ लाख कागदपत्रांपैकी १० कोटी ५ लाख कागदपत्रे मुंबई स्थित आहेत. काळानुरूप अत्याधुनिक पद्धतीने कागदपत्रांचे जतन आणि संवर्धन करणे, जुनी कागदपत्रे जतनाकरता स्वीकारणे अशा अनेक गोष्टींवर जागेअभावी मर्यादा येतात. त्यामुळे वांद्रे (पू.) जागेवर राज्याचे नवीन ‘महापुराभिलेख भवन’ बांधणार.