‘स्वच्छ, सुंदर बसस्थानक’ अभियानास कुर्ला येथे शुभारंभ !

मुंबई – राज्यभरातील एस्.टी.ची सर्व बसस्थानके ‘हिंदुहृदयसम्राट बाळासाहेब ठाकरे ‘स्वच्छ, सुंदर बसस्थानक’ अभियानाच्या माध्यमातून सुंदर आणि सुशोभित करण्यासाठी आम्ही प्रयत्न करू. हे अभियान केवळ एस्.टी.चे नसून एस्.टी. कर्मचार्‍यांसह प्रवाशांनी यामध्ये सहभाग नोंदवावा. ही लोकचळवळ करावी, असे आवाहन परिवहन मंत्री प्रताप सरनाईक यांनी केली. ते कुर्ला बसस्थानक येथे स्वच्छता अभियानाच्या शुभारंभप्रसंगी ते बोलत होते. स्वर्गीय बाळासाहेब ठाकरे यांच्या जयंतीनिमित्त परिवहनमंत्री प्रताप सरनाईक यांच्या शुभहस्ते कुर्ला नेहरूनगर बसस्थानकावर ‘हिंदुहृदयसम्राट बाळासाहेब ठाकरे स्वच्छ, सुंदर बसस्थानक अभियाना’च्या बोधचिन्हाचे अनावरण करून अभियानाचा शुभारंभ करण्यात आला.

मंत्री सरनाईक म्हणाले की,…

१. आपण आपल्या घरात ज्या पद्धतीने स्वच्छता ठेवतो, त्याप्रमाणेच आपण जिथे काम करतो, तेही आपले घर समजून त्या कार्यालयाची आणि बसस्थानकाची स्वच्छता ठेवणे, हे आपले कर्तव्य आहे.

२. भविष्यात स्वच्छ आणि सुंदर सुशोभित बसस्थानके प्रवाशांना आकर्षित करतील.

३. स्वच्छतेच्या संदर्भात परदेशात जेवढी सजगता आणि जागरूकता आहे, तेवढी भारतात नाही, ही वस्तूस्थिती आहे. या माध्यमातून भविष्यात चांगली बसस्थानके प्रवाशांच्या सेवेसाठी उपलब्ध असतील.