मुंबई सीबीआय पथकाने नाशिकमध्ये वरिष्ठ विपणन अधिकार्‍याला लाच घेतांना पकडले !

नाशिक – केंद्र सरकारच्या कृषी आणि किसान कल्याण मंत्रालयांतर्गत कृषी उत्पादकांना परवाना देणारे विपणन आणि तपासणी संचालनालय (एगमार्क) कार्यालय नाशिकरोड परिसरात असून धुळे येथील डेअरी प्रॉडक्ट्स बनवणार्‍या आस्थापनाने परवाना घेण्यासाठी या कार्यालयाकडे पाठपुरावा केला होता. या वेळी विपणन व्यवस्थापक विशाल तळवडकर यांनी १ लाख रुपयांच्या लाचेची मागणी केली होती. हे समजताच मुंबईच्या सीबीआय पथकाने सापळा रचून त्यांना रंगेहाथ अटक केली आहे.

सीबीआयने या प्रकरणी कार्यालयातील आणखी काही कर्मचार्‍यांच्या विरोधात गुन्हा नोंद केला आहे. तळवडकर यांनी सहकारी कर्मचार्‍यांसाठी ही लाच स्वीकारल्याचे प्रथम चौकशीतून समोर आले आहे. सीबीआयच्या या कारवाईने केंद्रीय कृषी विभागात खळबळ उडाली आहे. लाचखोरास नाशिकच्या विशेष सीबीआय न्यायालयात उपस्थित केले.