SANATAN PRABHAT EXCLUSIVE : बोरीवली (मुंबई) येथील नॅन्सी एस्.टी. बसस्थानकात स्वच्छतेची ‘एैशी कि तैशी’ !

सार्वजनिक मुतार्‍यांपेक्षाही प्रसाधनगृहाची लाजिरवाणी स्थिती !

वर्ष २०२३ मध्ये ‘सनातन प्रभात’च्या प्रतिनिधींनी राज्यातील जिल्हा ते तालुका पातळीपर्यंतच्या बसस्थानकांची स्वच्छता आणि प्रवाशांसाठीच्या सोयीसुविधा यांचा आढावा घेतला होता. ‘सनातन प्रभात’मधून बसस्थानकांच्या दुरवस्थेची वृत्तमालिका प्रसिद्ध करण्यात आली होती. हिंदु जनजागृती समितीच्या ‘सुराज्य अभियाना’च्या शिष्टमंडळाने महाराष्ट्र राज्य परिवहन महामंडळाचे तत्कालीन संचालक शेखर चन्ने यांची भेट घेऊन त्यांच्यापुढे आमच्या वृत्तांचा संदर्भ देत बसस्थानकांची दु:स्थिती मांडली. त्यानंतर महाराष्ट्रात १ मे २०२३ पासून ‘हिंदुहृदयसम्राट बाळासाहेब ठाकरे स्वच्छ सुंदर बसस्थानक’ हा उपक्रम चालू करण्यात आला.

मागील ३ वर्षे हे अभियान परिवहन विभागाकडून चालवले जात आहे. अनेक बसस्थानके या अंतर्गत चांगला प्रयत्न करत आहेत. राज्यातील बसस्थानकांमध्ये याद्वारे आमूलाग्र पालटही होत आहे; परंतु अद्यापही काही बसस्थानके स्वच्छतेकडे कमालीचे दुर्लक्ष करतात. स्वच्छतेच्या किमान गोष्टींकडेही अधिकारी दुर्लक्ष करत आहेत. ही स्थिती सरकार आणि समाज यांच्या लक्षात आणून देण्यासाठी ‘सनातन प्रभात’ पुन्हा एकदा बसस्थानकांच्या दु:स्थितीविषयीची वृत्तमालिका चालू करत आहे.

मुंबई – बोरीवली (पूर्व) येथील नॅन्सी एस्.टी. बसस्थानकातून राज्यातील विविध जिल्ह्यांसह अन्य राज्यांतही बस वाहतूक होते. पश्‍चिम मुंबईतील या महत्त्वाच्या बसस्थानकामध्ये स्वच्छतेची मात्र वानवा आहे. तुंबलेले शौचालय आणि मुतार्‍या, त्यांची तुटलेली दारे, घाणीने माखलेल्या भिंती अशी स्थिती आहे. सार्वजनिक मुतार्‍या बर्‍या म्हणाव्या, अशी या बसस्थानकांतील प्रसाधनगृहाची दु:स्थिती आहे. प्रसाधनगृहाची अवस्था पाहून एखादा मागेच फिरेल, अशी दयनीय अवस्था आहे. ‘सनातन प्रभात’च्या वार्ताहराने पहाणी केली, तेव्हा या प्रसाधनगृहाच्या बाहेरही मोठ्या प्रमाणात प्लास्टिकच्या पिशव्यांचा कचरा होता. अनेक दिवस या परिसराची स्वच्छता करण्यात आली नसल्याचे दिसून आले.

नॅन्सी एस्.टी. बसस्थानकातील अन्य सुविधांची दुरवस्था !

पाणपोईच्या बाहेर प्लास्टिक पिशव्यांचा कचरा

१. बसस्थानकामध्ये एक चौकोनी पाणपोई आहे; मात्र या पाणपोईचे काही नळ अनेक दिवसांपासून नादुरुस्त आहेत. पाणपोईच्या खालीही कचरा साचलेला होता.

२. बसस्थानकाचा परिसर साधारण ३ एकर इतका आहे. या परिसरातील दुर्लक्षित कोपर्‍यांमध्ये सकाळी ११.३० ते दुपारी १२ या वेळेत काहीजण मद्य पीत बसले होते. ‘गर्दुल्ले आणि बसस्थानकाच्या बाजूच्या झोपडपट्टीमधील काही जण मद्य पिण्यासाठी बसस्थानकातील जागेचा उपयोग करतात’, असे तेथील एका कर्मचार्‍याने सांगितले. बसस्थानकाला साधारण ५ फूट उंच संरक्षक भिंत आहे; मात्र त्यावरून उड्या टाकून हे मद्यपी येतात.

बसस्थानकाच्या परिसरात वाढलेली जंगली झुडपे आणि कचरा

३. बसस्थानकांच्या परिसरात काही ठिकाणी झुडपे वाढली आहेत. बसस्थानकांच्या परिसरात काही ठिकाणी खड्डे पडले आहेत. पावसाळ्यात या खड्ड्यांत पाणी साचते.

अपुरे कर्मचारी आणि निधीची कमतरता !

‘सनातन प्रभात’च्या प्रतिनिधीने बसस्थानकाचे साहाय्यक वाहतूक निरीक्षक अरुण गडरी यांची भेट घेऊन त्यांना बसस्थानकाच्या स्थितीविषयी विचारणा केली असता ते म्हणाले, ‘‘बसस्थानकातील शौचालयाचे बांधकाम स्थानिक आमदारांच्या निधीतून करण्यात आले आहे. या शौचालयाच्या स्वच्छतेचे कंत्राट खासगी कंत्राटदारकडे होते. कंत्राटाचा कालावधी संपल्यामुळे सध्या प्रसाधनगृहाची स्वच्छता महामंडळाचे कर्मचारी करतात. कर्मचारी अपुरे असल्यामुळे, तसेच बसस्थानकाचा परिसर मोठा असल्यामुळे स्वच्छता राखण्यास मर्यादा येतात. काही गर्दुल्ले बसस्थानकाच्या परिसरात येऊन मद्यपान करतात. त्यांना रोखण्यासाठी संरक्षण भिंतींची उंची वाढवणे आणि सुरक्षारक्षकांची नियुक्ती करणे आवश्यक आहे.’’

एकूणच या बसस्थानकातील प्रसाधनगृहाची दूरवस्था, त्यांची स्वच्छता, पाणपोईच्या नळांची दुरुस्ती, बसस्थानक परिसरात स्वच्छता राखणे, बसस्थानकाच्या परिसरातील खड्डे बुजवणे, परिसरात येणार्‍या मद्यपींना रोखणे आदींकडे लक्ष देणे आवश्यक आहे. महामंडळाद्वारे किंवा लोक सहभागातून या कामांसाठी निधीचे प्रावधान करणे आवश्यक आहे.