वल्लभनगर (पिंपरी-चिंचवड) बसस्थानकावर प्रवाशांच्या गैरसोयींचा ‘प्रवास’ चालूच !

मार्च-एप्रिल २०२३ मध्ये ‘सनातन प्रभात’ सलग १८ दिवस राज्यातील बसस्थानकांच्या दुरावस्थेची वृत्तमाला प्रसिद्ध झाली होती. त्यानंतर १ मे २०२३ या दिवशी तत्कालीन मुख्यमंत्री आणि परिवहनमंत्री एकनाथ शिंदे यांनी ‘हिंदुहृदयसम्राट बाळासाहेब ठाकरे स्वच्छ सुंदर बसस्थानक’ अभियान चालू केले. सध्याचे परिवहनमंत्री प्रताप सरनाईक या अभियानाला समर्थपणे पुढे नेत आहेत.

बसस्थानके स्वच्छ रहावीत, यासाठी ते स्वत: जातीने बसस्थानकांना भेटी देत आहेत; परंतु अद्यापही काही बसस्थानकांची स्थिती अत्यंत दयनीय आहे. ही स्थिती प्रशासनाच्या लक्षात यावी, यासाठी ‘सनातन प्रभात’ने बसस्थानकांच्या दु:स्थितीविषयीची वृत्तमाला पुन्हा चालू केली आहे.

पिंपरी-चिंचवड – येथील वल्लभनगर बसस्थानक हे औद्योगिक आणि रहिवासी क्षेत्रातील प्रवाशांसाठी महत्त्वाचे केंद्र आहे; मात्र सध्या या स्थानकावर काही मूलभूत सुविधांचा अभाव असल्याने प्रवाशांना मनःस्ताप सहन करावा लागत आहे.

For our complete ground report, do visithttps://t.co/eckAMdsfeR

— Sanatan Prabhat (@SanatanPrabhat) June 10, 2026

१.  पिण्याच्या पाण्याची व्यवस्था अपेक्षित अशी नाही. तेथील पाणी ‘हे हात धुण्याचे आहे कि पिण्यासाठीचे ?’, हे कळत नाही. याविषयी विचारणा केली असता तेथील कर्मचार्‍याने सांगितले, ‘‘लवकरच ३ जलशीतक (पाण्याचे कुलर) बसवण्यात येणार आहेत.’’ स्थानकावर पिण्याच्या पाण्याची व्यवस्था करण्यात आली असली, तरी प्रत्यक्षात तिथे पिण्याचे पाणी उपलब्ध नसल्याने प्रवाशांना विकतचे पाणी विकत घेण्यावाचून पर्याय उरलेला नाही.

२. काही ठिकाणी प्लास्टिक पडलेले असते. काही ठिकाणी कचरा, घाण आणि धुळीचे साम्राज्य आहे. त्याविषयी ‘सनातन प्रभात’च्या प्रतिनिधीने तेथील कर्मचार्‍यांना विचारणा केली असता ते म्हणाले, ‘‘आम्ही आमच्या परीने प्रयत्न करत आहोत; पण यामध्ये प्रवाशांचे सहकार्यही आम्हाला अपेक्षित आहे. काहींना आम्हाला सांगावे लागते की, येथे उघड्यावर शौच करू नका. सुलभ शौचालय तिकडे आहे. थुंकू नका, प्लास्टिक टाकू नका त्यासाठी कचरा पेटी ठेवली आहे.’’ (असे करणार्‍या प्रवाशांना कडक दंड करणे, हाच त्यावरील उपाय आहे ! – संपादक) काही दिवसांपूर्वी अन्य वृत्तपत्रामध्ये स्थानकाच्या अस्वच्छतेविषयी बातमी आली होती. त्यामध्ये आगार प्रमुख वैशाली कांबळे म्हणाल्या होत्या की, प्रवाशांकडून घेण्यात येणारा स्वच्छता अधिभार हा एस्.टी.च्या स्थानक स्वच्छेतेसाठी नसून बसच्या स्वछतेसाठी आहे. आम्ही उपलब्ध असणार्‍या मनुष्यबळावर स्थानक स्वच्छ ठेवण्याचा प्रयत्न करतो. या बातमीमध्ये प्रवाशांनीही स्वच्छतेविषयी असंतोष व्यक्त केला होता.

३. लांब पल्ल्याच्या प्रवासाच्या प्रवाशांना बसची वाट पहात असतांना थांबण्यासाठी हक्काचे विश्रामगृह उपलब्ध नाही.

४. बसस्थानकावरील महिलांसाठीचा ‘हिरकणी कक्ष’ (लहान बाळांना दूध पाजण्यासाठी  महिलांसाठी असलेली खोली) एरवी बंद असतो; परंतु एखाद्या महिलेला त्याचा उपयोग करायचा असेल, तर तिला तो बंद असल्याने त्याविषयी कळू शकत नाही. तरी त्यावर कुणाला आवश्यकता असल्यास त्याची चावी कुठे उपलब्ध होईल, याची माहिती देणारा फलक लावणे आवश्यक आहे.