कुर्टी, फोंडा येथील ‘सपना पार्क’ रहिवाशांचा आश्वासन देऊनही पाण्याचा प्रश्न कायम

नागरिकांनी सा.बां. खात्याच्या कार्यालयासमोर नोंदवला निषेध

फोंडा, २७ जुलै (वार्ता.) – कुर्टी, फोंडा येथील ‘सपना पार्क’मधील रहिवाशांना १५ दिवसांपूर्वी फोंडा येथे मुख्यमंत्री डॉ. प्रमोद सावंत यांच्या नेतृत्वाखालील ‘जनता दरबार’मध्ये पिण्याच्या पाण्याचा  प्रश्न सोडवण्याचे आश्वासन देण्यात आले होते. या वेळी मुख्यमंत्री डॉ. प्रमोद सावंत यांनी उपस्थित अधिकार्‍यांना आवश्यक कार्यवाही करण्याचे आदेशही दिले होते; मात्र ‘जनता दरबार’ होऊन आता १५ दिवस उलटूनही पिण्याच्या पाण्याचा प्रश्न सुटलेला नाही. या समस्येकडे लक्ष वेधण्यासाठी कुर्टी, फोंडा येथील ‘सपना पार्क’मधील रहिवाशांनी २७ जुलै या दिवशी सार्वजनिक बांधकाम खात्याच्या कार्यालयाबाहेर निषेध नोंदवला आणि समस्येवर त्वरित कायमस्वरूपी उपाययोजना करण्याची मागणी केली.

याविषयी पणजी येथे पत्रकारांशी बोलतांना पाणीपुरवठा मंत्री सुभाष फळदेसाई यांनी हा प्रश्न संबंधित अधिकार्‍यांकडे चर्चा करून तातडीने सोडवणार असल्याचे सांगितले.