‘पाणी प्यावे कि नको ?’ असा विचार करायला लावणारी अकोला बसस्थानकावरील पाणपोईची स्थिती !

एस्.टी. महामंडळाच्या ‘बसस्थानक स्वच्छता मोहिमे’चे खरे स्वरूप उघड करणारी दैनिक ‘सनातन प्रभात’ची वृत्तमालिका !

अमृत महोत्सवी वर्षानिमित्त केवळ घोषणा, प्रत्यक्षात बहुतांश बसस्थानकांची दुरवस्था !

राज्य परिवहन मंडळाने यंदाच्या ‘अमृत महोत्सवी’ वर्षात ‘बसस्थानक स्वच्छता मोहीम’ हाती घेऊन कार्यक्रमही निश्‍चित केला आहे. या मोहिमेला साहाय्य व्हावे, या हेतूने दैनिक ‘सनातन प्रभात’च्या प्रतिनिधींना लक्षात आलेली विविध शहारांतील बसस्थानकांची दुःस्थिती येथे मांडत आहोत. बसस्थानकांची ही विदारक स्थिती पालटली आणि तिथे मूलभूत सोयी उपलब्ध झाल्या, तर ‘प्रवाशांच्या सेवेसाठी’ हे परिवहन मंडळाचे ब्रीदवाक्य अधिक खरे ठरेल. ‘आर्थिक गर्तेत सापडलेल्या ‘आपल्या’ एस्.टी.ला पुन्हा गतवैभव प्राप्त व्हावे’, अशीच सर्वसामान्यांची भावना आहे. या वृत्तमालिकेच्या माध्यमातून एस्.टी.च्या पुनरुत्थानासाठी चळवळ उभी रहावी, हाच आमचा प्रामाणिक हेतू आहे.

श्री. दत्तात्रय फोकमारे, यवतमाळ

अकोला, २३ मार्च (वार्ता.) – थर्माकॉलचे तुटलेले पेले, तंबाखूच्या पिचकार्‍या, साचलेला कचरा आणि अतिशय मळलेल्या टाईल्स, अशी अकोला बसस्थानकावरील पाणपोईची स्थिती पाणी पिण्यासाठी आलेल्या प्रवाशांना ‘पाणी प्यावे कि नको ?’ असा विचार करायला लावणारी आहे. अमृत महोत्सवी वर्ष साजरे करतांना बसस्थानकांवर किमान स्वच्छ पिण्याच्या पाण्याची व्यवस्थाही का होऊ शकली नाही ? असा प्रश्‍न एस्.टी. महामंडळाला पडायला हवा.

बसस्थानकावरील पिण्याच्या पाण्याच्या टाकीजवळ कायम कचरा असल्याने तेथे भटक्या कुत्र्यांचा वावर असतो. पिण्याच्या पाण्याच्या नळाखालीही कचरा आणि अस्वच्छता पहाता अनेक दिवस या पाणपोईची स्वच्छता करण्यात आली नसल्याचे दिसून येते. बसस्थानकाच्या परिसरात ‘श्री रामदेवबाबा जल सेवा समिती’च्या वतीने सेवाभावी वृत्तीने पिण्याच्या पाण्याची व्यवस्था करण्यात आली आहे. या ठिकाणीही अतिशय अस्वच्छता आहे. सतत पाणी ठिबकत असल्यामुळे येथे शेवाळे साचले असून घाणही झाली आहे.

बसस्थानके स्वच्छ राखण्यासाठी प्रवाशांनीही दायित्व उचलावे !

अकोला बसस्थानकाच्या पिण्याच्या पाण्याच्या ठिकाणी प्लास्टिकच्या पिशव्या, थर्माकॉलचे पेले किंवा खाऊची वेष्टने टाकणारे, तंबाखूच्या पिचकार्‍यांनी टाईल्स खराब करणारे येथे येणारे प्रवासीच आहेत. सार्वजनिक ठिकाणी स्वच्छता राखणे, हे प्रत्येक नागरिकांचे कर्तव्य आहे. एस्.टी.ची बसस्थानके स्वच्छ राखण्यासाठी प्रवाशांनीही त्यांचे दायित्व उचलायला हवे. राज्य परिवहन मंडळानेही प्रवाशांवर स्वच्छतेचा संस्कार करण्यासाठी आवश्यक सूचना लावणे, कचरा टाकण्यासाठी व्यवस्था करणे आदी उपाययोजना करणे आवश्यक आहे.