कुणाल कामरा आणि सुषमा अंधारे यांच्याविरुद्ध विधान परिषदेत हक्कभंग

मुंबई, २६ मार्च (वार्ता.) – स्टँडअप कॉमेडियन (एकट्याने विनोद करणारा कलाकार) कुणाल कामरा याने उपमुख्यमंत्री एकनाथ शिंदे यांच्यावर विडंबनात्मक कविता सादर केली होती. तीच कविता, त्याच चालीत, ठाकरे गटाच्या प्रवक्त्या सुषमा अंधारे यांनी माध्यमांशी बोलतांना म्हटली होती. याचे पडसाद २६ मार्च या दिवशी विधान परिषदेच्या सभागृहात उमटले. भाजपचे गटनेते आमदार प्रवीण दरेकर यांनी कामरा आणि अंधारे यांच्या विरोधात हक्कभंग प्रस्ताव प्रविष्ट केला.

आमदार प्रवीण दरेकर म्हणाले की, हा एक प्रकारे सभागृहाचा किंबहुना सभागृहातील सर्व सदस्यांचा अवमान आहे. त्यांनी एकप्रकारे सभागृहातील सदस्यांना डिवचण्याचा प्रयत्न केला आहे, ही गोष्ट अत्यंत गंभीर आहे. अंधारे यांनी वापरलेली खालच्या पातळीवरील भाषा आणि कुणाल कामरा याने हेतूपूरस्पर उपमुख्यमंत्री यांच्यावर वैयक्तिक आणि उपरोधिक केलेले गाणे यांतील भाषा एकप्रकारे सभागृहाचा अवमान करणारे आहे. सभापती राम शिंदे यांनी हे प्रकरण विशेषाधिकार समितीकडे योग्य त्या कारवाईसाठी पाठवत असल्याचे घोषित केले.