परिवहन मंडळाच्या सर्व बसस्थानकांवर ‘स्वच्छ, सुंदर बसस्थानक अभियान’ राबवणार !

मुंबई – स्वर्गीय बाळासाहेब ठाकरे यांच्या जयंतीनिमित्त पुढील वर्षभर राज्य परिवहन मंडळाच्याच्या राज्यभरातील सर्व बसस्थानकांवर शिवसेना पक्षनेते आणि उपमुख्यमंत्री एकनाथ शिंदे यांच्या संकल्पनेतून ‘हिंदुहृदयसम्राट बाळासाहेब ठाकरे स्वच्छ, सुंदर बसस्थानक अभियान’ राबवण्यात येणार आहे. राज्याचे परिवहनमंत्री प्रताप सरनाईक यांनी ही घोषणा केली. या अभियानाचा शुभारंभ २३ जानेवारी या दिवशी सकाळी ११ वाजता कुर्ला नेहरूनगर बसस्थानकावर होणार आहे.

३ कोटी रुपयांची पारितोषिके या अभियानांतर्गत वाटण्यात येणार आहेत. राज्यात ‘अ’ वर्गात पहिल्या येणार्‍या बसस्थानकाला १ कोटी, ‘ब’ वर्गासाठी ५०, तर ‘क’ वर्गातील पहिल्या येणार्‍या बसस्थानकाला २५ लाख रुपये देण्यात येतील.

यानिमित्ताने सर्व राज्यभर प्रत्येक बसस्थानकावर शालेय विद्यार्थी, सामाजिक संस्था आणि राज्य परिवहन कर्मचार्‍यांच्या सहकार्यातून सखोल स्वच्छता मोहीम राबवण्यात येत आहे. प्रति ३ महिन्यांनी प्रत्येक बसस्थानकाचे मूल्यमापन होईल. त्यासाठी परीक्षण समित्या नेमण्यात आल्या आहेत.

स्वच्छ आणि सुंदर बसस्थानक, निर्जंतुक आणि टापटीप प्रसाधनगृहे कायमस्वरूपी उपलब्ध करून नेणे, हे राज्यपरिवहन महामंडळाचे प्रथम कर्तव्य आहे, असे यापूर्वी उपमुख्यमंत्री एकनाथ शिंदे यांनी स्पष्ट केले होते.

लोकसहभागातून स्थानकांचा विकास केला जाणार आहे. गावातील तरुण मंडळे, महिला बचत गट, विविध सामाजिक संस्था, उद्योग समूह यांनी पुढे येऊन त्या बसस्थानकाचे सुशोभीकरण आणि सौंदर्यीकरण यासाठी साहाय्य करावे, असे आवाहन परिवहनमंत्र्यांनी केले आहे.