‘चिंचवड देवस्थान ट्रस्ट’कडून अष्टविनायक गणपतींपैकी ३ मंदिरांसह ५ मंदिरांमध्ये वस्रसंहिता लागू !

मंदिराचे पावित्र्य राखण्यासाठी तोकडे कपडे परिधान करून दर्शनासाठी न येण्याची विनंती !

पुणे – अष्टविनायक गणपतींपैकी मोरगावचा मोरेश्वर, थेऊरचा चिंतामणी, सिद्धटेकचा सिद्धिविनायक यांसह चिंचवडचे मोरया गोसावी संजीवन मंदिर, तसेच खार नारंगी मंदिरात दर्शनासाठी पोशाखाची नियमावली घोषित करण्यात आली आहे. ही ५ मंदिरे ज्या ट्रस्टच्या अखत्यारीत आहेत, त्या चिंचवड देवस्थान ट्रस्टकडून ही वस्रसंहिता (वस्रसंहिता म्हणजे मंदिरात कपडे घालून येण्याच्या संदर्भातील नियमावली) लागू करण्यात आली आहे; मात्र ही सक्ती नाही, तर मंदिराचे पावित्र्य राखण्यासाठी तोकडे कपडे परिधान करून दर्शनासाठी न येण्याची विनंती करण्यात आल्याचेही ‘चिंचवड देवस्थान ट्रस्ट’चे म्हणणे आहे.

त्यामुळे यापुढे अष्टविनायकांपैकी पुणे जिल्ह्यातील पाचही गणपति मंदिरांत आता परिपूर्ण आणि अंगभर पोशाख घालूनच भाविकांनी दर्शनाच्या रांगेत उभे राहिले पाहिजे.