बसस्थानके-आगार यांमधील भंगार आणि जप्त गाड्या १५ एप्रिलपर्यंत निष्काषित करा !

परिवहनमंत्री प्रताप सरनाईक यांचा आदेश !

मुंबई – स्वारगेट बसस्थानकावर झालेल्या बलात्काराच्या प्रकरणानंतर परिवहनमंत्री प्रताप सरनाईक यांनी राज्यातील सर्व बसस्थानके आणि आगार येथील सुरक्षा व्यवस्थेचे लेखापरीक्षण करण्याची सूचना दिली आहे, तसेच १५ एप्रिलपर्यंत भंगारात काढलेल्या आणि जप्त करण्यात आलेल्या सर्व गाड्या निष्काषित करण्याचा आदेश दिला आहे. परिवहन विभागाकडून याविषयीची माहिती देण्यात आली आहे.

महिला प्रवाशांची वाढती संख्या लक्षात घेता बसस्थानकावर महिला सुरक्षा रक्षकांची संख्या वाढवण्यात यावी. स्थानिक पोलिसांच्या साहाय्याने बसस्थानकांवरील गस्त वाढवण्यात यावी. परिवहन महामंडळाकडे रिक्त असलेल्या मुख्य सुरक्षा आणि दक्षता अधिकारी पदांवर भारतीय पोलीस सेवेतील (आय.पी.एस्.) अधिकार्‍यांची नियुक्ती करण्यात यावी. याविषयीचा प्रस्ताव गृह विभागाला विनाविलंब सादर करावा, अशा प्रताप सरनाईक यांनी दिल्या. बसस्थानकांमध्ये महिला प्रवाशांच्या सुरक्षेचा आढावा प्रताप सरनाईक यांनी घेतला.

बसस्थानकावर काम करणार्‍या प्रत्येक एस्.टी. कर्मचार्‍याला ओळखपत्र देण्यात यावे; जेणेकरून कर्मचारी असल्याचे भासवून प्रवाशांना कुणी लुबाडणार नाही आदी सूचना परिवहनमंत्र्यांनी शासकीय अधिकार्‍यांना दिल्या आहेत.