परिषदेला मोठ्या संख्येने उपस्थित राहून हिंदूंनी हलाल सक्तीच्या विरोधात एकजूट दाखवावी ! – डॉ. विजय जंगम, कार्याध्यक्ष, अखिल भारतीय वीरशैव लिंगायत महासंघ

९ ऑक्टोबर या दिवशी मुंबई येथे ‘हलाल सक्तीविरोधी परिषद’ !

मुंबई – हलाल प्रमाणपत्रातून येणारा पैसा देशविघातक कामांसाठी वापरला जात असल्याची दाट शक्यता आहे. हे केवळ हिंदुत्वावरील नव्हे, तर देशाच्या अर्थव्यवस्थेवरील मोठे संकट आहे. यातून देशात समांतर अर्थव्यवस्था निर्माण केली जात आहे. हिंदूंनी मोठ्या संख्येने उपस्थित राहून हलाल सक्तीच्या विरोधात एकजूट दाखवावी, असे आवाहन अखिल भारतीय वीरशैव लिंगायत महासंघाचे कार्याध्यक्ष डॉ. विजय जंगम यांनी केले. स्वातंत्र्यवीर सावरकर राष्ट्रीय स्मारकामध्ये ९ ऑक्टोबर या दिवशी सायंकाळी ५.३० वाजता स्वातंत्र्यवीर सावरकर राष्ट्रीय स्मारक आणि हिंदु जनजागृती समिती यांच्या वतीने हलाल सक्तीविरोधी परिषद आयोजित करण्यात आली आहे. याविषयी माहिती देण्यासाठी आयोजित केलेल्या पत्रकार परिषदेत डॉ. विजय जंगम यांनी वरील आवाहन केले.

या पत्रकार परिषदेला अखिल भारतीय खाटिक समाजाचे राष्ट्रीय महासचिव श्री. विवेक घोलप, हिंदु जनजागृती समितीचे प्रवक्ते डॉ. उदय धुरी उपस्थित होते. समितीचे श्री. नरेंद्र सुर्वे यांनी प्रस्तावना केली.

या वेळी डॉ. विजय जंगम म्हणाले, ‘‘हलाल आता केवळ मांसापुरते मर्यादित नसून धान्य, फळे, सौंदर्यप्रसाधने, औषधे आदी अनेक उत्पादनेही ‘हलाल’ प्रमाणित असावीत, यासाठी हिंदु व्यावसायिकांना हलाल प्रमाणपत्राची सक्ती केली जात आहे. या खासगी संस्थांना अशा प्रकारे ‘हलाल प्रमाणपत्र देण्याचा अधिकार आहे का ? याविषयी अद्याप कोणत्याही सरकारी यंत्रणेने अधिकृतपणे माहिती दिलेली नाही. देशाची अर्थव्यवस्था कोणत्याही एका पंथाच्या हातात जाऊ नये. हलालचे जाळे भविष्यात संपूर्ण देशात पसरायला वेळ लागणार नाही. पंतप्रधान नरेंद्र मोदी यांना मी आवाहन करतो की, अशा गोष्टींवर तात्काळ बंदी घालावी. याविषयीची भीषणता जाणून घेण्यासाठी सर्व देशबांधवांना मी विनंती करतो, की, त्यांनी हलाल सक्तीविरोधी परिषदेला उपस्थित रहावे.’’