कोरोनाबाधित रुग्णांना वैद्यकीय क्षेत्रातील साहाय्य उपलब्ध करून देणारे सोलापूर येथील सामाजिक कार्यकर्ते !

कोरोनाच्या संकटकाळात सैरभैर झालेल्या सामान्य नागरिकांना वैद्यकीय क्षेत्रातील साहाय्य उपलब्ध करून देणारे सोलापूर येथील सामाजिक कार्यकर्ते समाजासाठी आदर्शच आहेत. हाच आदर्श घेऊन अन्य कार्यकर्ते आणि संघटना यांनीही नागरिकांना साहाय्य करण्यासाठी पुढे यावे !

सोलापूर, २६ एप्रिल (वार्ता.) – येथे कोरोनाचा संसर्ग वाढत असून अनेक लोकांना वैद्यकीय साहाय्याची आवश्यकता निर्माण होत आहे. अशा स्थितीत ‘सेवा परमो धर्म:।’ या श्‍लोकाप्रमाणे येथील काही सामाजिक कार्यकर्ते कोरोनाबाधितांना वेळेत उपचार मिळावेत, यासाठी गरजू लोकांना वैद्यकीय साहाय्य मिळवून देण्यासाठी कार्यरत झाले आहेत. येथील बालराज कैरमकोंडा, शाम पेगडा, तुषार मोरे, तसेच गुरु रापोल या सामाजिक कार्यकर्त्यांनी एकत्र येऊन पुढाकार घेतला आहे. हे कार्यकर्ते प्रतिदिन शेकडो गरजू लोकांना कोरोना संदर्भात आवश्यक ती सर्व प्रकारची वैद्यकीय क्षेत्रातील माहिती उपलब्ध करून देऊन त्यांना दिशादर्शनही करत आहेत. गरजूंना कोणत्या रुग्णालयात खाटा उपलब्ध आहेत, याची माहिती देणे, वाहन उपलब्ध करून देणे, रुग्णवाहिका उपलब्ध करून देणे, ऑक्सिजन बेड उपलब्ध करून देणे, यांसमवेत वैद्यकीय क्षेत्रातील आवश्यक ते साहाय्य ते करत आहेत. हे कार्यकर्ते जिल्ह्यातील विविध रुग्णालयांच्या संपर्कात असून ते रुग्णांना आवश्यक ती सुविधा उपलब्ध करून देत आहेत. विशेष म्हणजे हे सामाजिक कार्यकर्ते सर्व कार्य विनामूल्य करत असून सोलापूर जिल्ह्यातील गरजू लोकांसह अन्य जिल्ह्यांतील नागरिकांनाही साहाय्य करत आहेत.