हिंदूंच्या देवतांचा अवमान करणार्‍या ‘तांडव’ वेब सिरीजवर बंदी घाला !  

केंद्रीय माहिती आणि प्रसारण मंत्री प्रकाश जावडेकर यांच्याकडे भाजप नेत्यांची मागणी

  • इस्लामी राष्ट्रांत कुणी जर महंमद पैगंबर किंवा कुराण यांचा चित्रपट, नाटक, वेब सिरीज किंवा सामाजिक माध्यमांतून अवमान केला, तर त्याला थेट मृत्यूदंडाची शिक्षा केली जाते. ख्रिस्ती राष्ट्रांत येशू किंवा बायबल यांचा अवमान केल्यास त्याला कठोरात कठोर शिक्षा होते. याउलट हिंदूबहुल; पण ‘निधर्मी’ भारतात कुणीही ऊठसूठ हिंदूंच्या देवतांच्या मूर्ती फोडतो, हिंदूंचे धर्मग्रंथ जाळतो, देवतांची टिंगळटवाळी करतो, वेब सिरीज, चित्रपट, नाटक, विज्ञापने यांच्या माध्यमांतून देवतांचे विडंबन करतो; पण त्याविषयी बहुसंख्य हिंदूंना काही वाटत नाही, हे दुर्दैव आहे. सहिष्णु जन्महिंदूंना धर्मशिक्षण न दिल्यामुळेच ही स्थिती उद्भवली आहे !
  • केंद्रात भाजपची सत्ता असल्याने या पक्षाच्या नेत्यांनी अशी मागणी करण्यासह ही वेब सिरिज बंद करण्याची मागणी सरकारकडे लावून धरणे हिंदूंना अपेक्षित आहे !

नवी देहली – अभिनेते सैफ अली खान यांची प्रमुख भूमिका असलेल्या ‘अ‍ॅमेझॉन प्राईम’ या ‘ओटीटी’ अ‍ॅपवरून प्रदर्शित झालेल्या ‘तांडव’ या वेब सिरीजमधून भगवान शिव आणि श्रीराम यांचा अवमान करण्यात आल्याने तिच्यावर बंदी घालण्यात यावी, अशी मागणी केंद्रीय माहिती आणि प्रसारण मंत्री प्रकाश जावडेकर यांच्याकडे भाजपचे नेते कपिल मिश्रा, नरेंद्रकुमार चावला, गौरव गोयल, खासदार योगी बालकनाथ, मुंबईतील खासदार मनोज कोटक यांच्यासह अनेक भाजप नेत्यांनी केली आहे. तसेच सामाजिक माध्यमांतून ‘#BanTandavNow’ आणि ‘#BoycottBollywood’  हे हॅशटॅगही ट्रेेंड करण्यात आले आहेत. यावर १ लाख ६५ सहस्र लोकांनी ट्वीट्स करून या वेब सिरीजचा विरोध केला. हिमांशु किशन मेहरा आणि अली अब्बास जफर यांच्याद्वारे निर्मित ‘तांडव’ ही वेब सिरीज ९ भागांची आहे. त्यात सैफ अली खान यांच्यासमवेत महंमद झिशान, अभिनेत्री डिंपल कपाडिया, अभिनेते सुनील ग्रोव्हर हे कलाकार आहेत.

‘तांडव’ वेब सिरीजवर बहिष्कार घाला ! – राम कदम, आमदार, भाजप

भाजपचे आमदार राम कदम यांनी जोपर्यंत या वेब सिरीजमध्ये योग्य ते पालट करण्यात येत नाहीत, तोपर्यंत ‘तांडव’ वेब सिरीजवर बहिष्कार टाकण्याचे आवाहन केले आहे. आमदार राम कदम यांनी सामाजिक माध्यमांत ट्वीट करतांना म्हटले आहे की, चित्रपट किंवा वेब सिरीज यांच्या माध्यमातून कायम हिंदूंच्या देवतांचा अवमान का केला जातो ? अलीकडचे उदाहरण घ्यायचे झाले, तर नवीन वेब सिरीज ‘तांडव’ हे आहे. हिंदूंच्या धार्मिक भावना दुखावल्या जाणार्‍या वेब सिरीजचे सैफ अली खान पुन्हा एकदा भाग बनले आहेत. दिग्दर्शक अली अब्बास जफर यांनी वेब सिरीजमधून ते दृश्य हटवले पाहिजे. अभिनेता झिशान अय्यूब याने जाहीरपणे क्षमा मागावी.

वेब सिरीजमधून सातत्याने हिंदुविरोधी गोष्टींचे प्रदर्शन ! – भाजपचे खासदार मनोज कोटक

केंद्रात भाजपचेच सरकार असल्याने कोटक यांनी सरकारला सांगून अशा वेब सिरीजवर बंदी घालण्यासह त्यांच्यावर नियंत्रण ठेवण्यासाठी तात्काळ कायदा करण्याची मागणी केली पाहिजे, असेच हिंदूंना वाटते !

सौजन्य : TV9 Marathi

(खासदार मनोज कोटक यांचे पत्र वाचण्यासाठी चित्रावर क्लिक करा)

खासदार मनोज कोटक यांनी म्हटले आहे की,  सातत्याने वेब सिरीजमधून हिंदूविरोधी गोष्टी दाखवण्यात येत आहेत. हिंदूंच्या देवतांची सतत थट्टा करण्यात येत आहे. त्यामुळे हिंदूंच्या भावना दुखावल्या जात आहेत. यावर तात्काळ बंदी घालणे आवश्यक आहे.