Hubballi Girl Rape Murder Case : ५ वर्षांच्या मुलीवर बलात्काराचा प्रयत्न करून हत्या करणार्‍या आरोपीला पोलिसांनी चकमकीत केले ठार

हुब्बळ्ळी (कर्नाटक) – येथे ५ वर्षांच्या मुलीवर बलात्काराचा प्रयत्न आणि नंतर तिची हत्या करणार्‍या आरोपीला पोलिसांनी १३ एप्रिलच्या रात्री चकमकीत ठार केले. या चकमकीत एका उपनिरीक्षकासह ३ पोलस घायाळ झाले. रितेश (वय ३५ वर्षे) असे या आरोपीचे नाव असून तो मूळचा बिहारचा आहे. त्याने मुलीचे तिच्या घराजवळून दिवसा अपहरण केले होते. तो तिला एका निर्जन ठिकाणी असलेल्या शेडमध्ये घेऊन गेला. येथे बलात्कार करण्याचा प्रयत्न केला. मुलीचा ओरडण्याचा आवाज ऐकून लोक जमा झाले. घाबरून आरोपीने मुलीचा गळा दाबून खून केला आणि तेथून पळून गेला.

घटनेची माहिती मिळताच पोलिसांनी शोध घेऊन त्याला काही घंट्यातच अटक केली. त्याला कागदपत्रे आणि ओळख पडताळणीसाठी पोलिसांनी त्याच्या घरी नेले होते. तेथे त्याने पळून जाण्याचा प्रयत्न केला आणि पोलिसांवर दगडाने आक्रमण केले. या वेळी पोलिसांनी हवेत गोळीबार केला, तरीही तो पळून जाण्याचा प्रयत्न करत राहिला. त्यामुळे पोलिसांनी त्याच्यावर गोळ्या झाडल्या. यात तो घायाळ झाल्यानंतर त्याला रुग्णालयात नेले असता डॉक्टरांनी त्याला मृत घोषित केले. तो गेल्या काही मासांपासून येथे मजूर म्हणून काम करत होता.