नाडीपट्टीत उल्लेखल्यानुसार हनुमानचालिसाचे सामूहिक पठण करतांना सिंधुदुर्ग जिल्ह्यातील साधकांना जाणवलेली सूत्रे आणि आलेल्या काही वैशिष्ट्यपूर्ण अनुभूती

 १. सौ. प्रतिभा चव्हाण, कणकवली, सिंधुदुर्ग

अ. ‘हनुमानचालिसा पठण करण्यापूर्वी मला ‘त्यातील उच्चार कठीण आहेत’, असे वाटून हनुमानचालिसा केवळ ऐकत राहूया’, असे वाटले; मात्र भ्रमणभाषवर हनुमानचालिसा लावल्यावर आपोआप आमचे सूर जुळले.

आ. हनुमानचालिसा म्हणतांना ‘मी रामराज्यातच आहे. माझे अनिष्ट शक्तींपासून रक्षण होत आहे. मी वेगळ्याच विश्वात आहे’, असे मला वाटले. त्या वेळी ‘मी कुठे आहे ?’, याचे मला भान नव्हते.

इ. मला मध्येच सद्गुरु सत्यवान कदम यांची आठवण येऊन माझा भाव दाटून आला. मला प्राणप्रिय गुरुमाऊली आणि सद्गुरु सत्यवानदादा यांची पुष्कळ आठवण आली अन् माझी भावजागृती झाली.

ई. हनुमानचालिसा पठण पूर्ण झाल्यानंतर ‘जागेवरून उठूच नये. त्याच स्थितीत बसून रहावे’, असे मला वाटत होते. मला घरातील वातावरणात वेगळाच पालट जाणवत होता. मला पुष्कळ प्रसन्न आणि आल्हाददायक वाटत होते.’

 २. सौ. प्राजक्ता सावंत, कणकवली, सिंधुदुर्ग.

अ. ‘हनुमानचालिसा पठण करण्यापूर्वी माझ्याकडून मारुतिरायाला संपूर्ण शरणागतीने प्रार्थना झाली.

आ. मला सूक्ष्मातून दिसले की, हनुमंत लहान रूपांत बसलेल्या सर्व साधकांभोवती गोल वर्तुळाकारात फिरत आहे. मला त्याची अनेक रूपे दिसली.

इ. पठण चालू झाल्यावर मला आरंभी पुष्कळ ऊर्जा जाणवली.

ई. त्यानंतर मला पूर्ण वास्तूत थंडावा जाणवत होता. अन्य साधकांनाही वातावरणात गारवा जाणवत होता.

उ. ‘माझ्यासमोर आसंदीत सद्गुरु सत्यवानदादा विराजमान आहेत’, असे मला सूक्ष्मातून दिसत होते.

ऊ. मी काही क्षण निर्विचार स्थिती अनुभवली.’

३. श्री. प्रदीप सावंत, कणकवली, सिंधुदुर्ग.

३ अ. हनुमानाच्या चित्रात सद्गुरु सत्यवान कदम यांचा हसरा चेहरा दिसणे : ‘हनुमान चालिसा पठणाला आरंभ झाल्यानंतर २ – ३ मिनिटांनी समोर ठेवलेल्या हनुमानाच्या चित्रात मला सद्गुरु सत्यवानदादा दिसत होते. मला सद्गुरु सत्यवानदादांचा हसरा चेहरा सतत दिसत होता.’

४. सौ. भारती सावंत, कणकवली, सिंधुदुर्ग.

४ अ. ‘शारीरिक त्रासांवर मात करण्यासाठी मारुतिरायाने शक्ती दिली’, असे जाणवणे : ‘मला शनिवार सकाळपासून पुष्कळ त्रास होत होता. मला उलट्या होत होत्या. त्यामुळे मी झोपूनच होते. मला काहीच करता येत नव्हते. मला सकाळी पावणेअकरा वाजता हनुमान चालिसा पठण करण्याची आठवण झाली. ‘मारुतिराया मला शक्ती देत आहेत’, असे जाणवून मी वैयक्तिक आवरून पठणाला बसले. मला त्या सव्वा घंट्यात त्रासाची जाणीवही झाली नाही.

४ आ. मला सद्गुरु सत्यवानदादांचे स्मरण होत होते. मला सद्गुरु सत्यवानदादांमध्ये नेहमी मारुतितत्त्व अनुभवायला येते.’

५. कु. प्रतीक्षा परब, कुडाळ सेवाकेंद्र, सिंधुदुर्ग.

अ. ‘हनुमानचालिसा पठण चालू होताच मला कुरूक्षेत्रावरील अर्जुनाच्या रथावर विराजमान झालेल्या मारुतिरायाचे दर्शन झाले.

आ. त्यानंतर लगेचच माझ्या डोळ्यांसमोर ब्रह्मोत्सवातील प.पू. गुरुदेव, श्रीसत्‌शक्ति (सौ.) बिंदा नीलेश सिंगबाळ आणि श्रीचित्‌शक्ति (सौ.) अंजली मुकुल गाडगीळ यांच्या रथावर विराजमान झालेल्या मारुतिरायाचे रूप आले. त्या वेळी माझ्या मनात विचार आले, ‘पुढे येणार्‍या आपत्काळातही मारुतिराया गुरुदेव आणि साधक यांच्या रक्षणासाठी अन् त्यांना बळ प्रदान करण्यासाठी अखंड समवेत असणार आहे.’ माझ्या मनात हे विचार आले आणि मला त्याप्रमाणे दृश्य दिसत होते.

इ. माझी भावजागृतीही होत होती. माझ्या मनात केवळ कृतज्ञताभाव होता. माझी ही स्थिती पठण पूर्ण होईपर्यंत टिकून होती.

ई. माझे अनेक दिवसांपासून व्यष्टी साधनेचे प्रयत्न होत नव्हते. मला व्यष्टी साधनेचे प्रयत्न करत असतांना येत असलेल्या अडथळ्यांवर मात करता येत नव्हती. हनुमानचालिसा पठणानंतर मला पुन्हा सेवांमधून आनंद घेता येत आहे. आता मला शारीरिक, तसेच मानसिक स्तरावर येणार्‍या अडचणींवर मात करता येत आहे. मला त्यातून शिकायला मिळत असल्याने साधनेतील आनंद घेता येत आहे.’

६. कु. वैभवी भोवर (आध्यात्मिक पातळी ६४ टक्के, वय २८ वर्षे), कुडाळ सेवाकेंद्र, सिंधुदुर्ग.

अ. ‘मी हनुमानचालिसा म्हणत असतांना ‘शरिरात पुष्कळ ऊर्जा निर्माण होत आहे’, असे मला जाणवत होते.

आ. हनुमानचालिसा म्हणत असतांना शेवटी प्रार्थनास्वरूप असलेला श्लोक म्हणतांना मला ‘मोठ्या मैदानात सर्व साधक एकत्रित आले आहेत आणि समोर प.पू. गुरुदेव आहेत’, असे दृश्य दिसत होते.

इ. माझ्या शरिरावर रोमांच येत होते.

ई. मला पूर्ण दिवस पुष्कळ हलकेपणा जाणवत होता.’

(लेखातील सर्व सूत्रांचा दिनांक : २.४.२०२५)