‘छत्रपती शिवाजी महाराज विद्यापीठ’ नामविस्ताराचा निर्णय तातडीने घ्यावा ! – आमदार राजेश क्षीरसागर, शिवसेना

शिवसेनेचे आमदार राजेश क्षीरसागर यांची विधानसभेत मागणी !

मुंबई, १७ मार्च (वार्ता.) – कोल्हापूर येथील ‘शिवाजी विद्यापीठ’ नावामध्ये छत्रपती शिवाजी महाराजांच्या नावाचा एकेरी उल्लेख करण्यात आला आहे. शिवाजी विद्यापिठाचा नामविस्तार ‘छत्रपती शिवाजी महाराज विद्यापीठ’, असा करण्यासाठी १७ मार्च या दिवशी कोल्हापूर येथे सहस्रावधींच्या संख्येने मोर्चा काढण्यात येत आहे. छत्रपती शिवाजी महाराज विद्यापीठ या नामविस्ताराचा निर्णय शासनाने तातडीने घ्यावा, अशी मागणी शिवसेनेचे आमदार राजेश क्षीरसागर यांनी १७ मार्च या दिवशी माहितीच्या सूत्राच्या अंतर्गत विधानसभेत केली.

‘कोल्हापूर येथे काढण्यात येणार्‍या या मोर्च्यामध्ये मोठ्या प्रमाणात विद्यार्थी सहभागी होणार आहेत. ‘छत्रपती शिवाजी महाराज टर्मिनस’, ‘आंतरराष्ट्रीय छत्रपती संभाजी महाराज विमानतळ’ अशा विविध वास्तूंतील राष्ट्रपुरुषांच्या नावाचा आदराने उल्लेख केला जातो. यासह राज्यात राष्ट्रपुरुषांचा उल्लेख एकेरी करण्यात आला असेल, तर तो आदराने करावा’, असे आमदार क्षीरसागर म्हणाले.