अमेरिकेत लवकरच पाकिस्तानी नागरिकांना प्रवेशबंदी !

अमेरिका अनेक इस्लामी देशांतील नागरिकांवर बंदी घालण्याच्या सिद्धतेत

वॉशिंग्टन (अमेरिका) – अमेरिकेचे राष्ट्राध्यक्ष डॉनल्ड ट्रम्प अमेरिकेत पाकिस्तान आणि अफगाणिस्तान येथील नागरिकांना प्रवेश करण्यापासून रोखणार आहेत. सुरक्षेच्या कारणावरुन ट्रम्प या दोन देशांतील नागरिकांना अमेरिकेत येण्यास बंदी घालण्याच्या सिद्धतेत आहेत. या संदर्भातील आदेश पुढील आठवड्यात काढण्यात येण्याची शक्यता आहे. यात अन्यही काही देशांचा समावेश असण्याची शक्यता आहे. ट्रम्प यांनी त्यांच्या मागील कार्यकाळात ७ (इराण, इराक, लिबिया, सोमालिया, सुदान, सीरिया आणि येमेन) इस्लामी देशांतील नागरिकांना अमेरिकेत येण्यास बंदी घातली होती; मात्र वर्ष २०२१ मध्ये माजी राष्ट्राध्यक्ष जो बायडेन यांनी ही बंदी उठवली होती.

ट्रम्प यांनी अफगाणिस्तानवर बंदी घातली, तर सहस्रोंच्या संख्येने अमेरिकेत आलेल्या अफगाणी लोकांवर संकट कोसळणार आहे. तालिबान राजवटीमुळे ते लोक अफगाणिस्तान सोडून अमेरिकेत आले आहेत.