पुणे येथे अटक केलेल्या बांगलादेशी घुसखोराकडून अनेक कागदपत्रे जप्त !

बनावट नावांचा उपयोग, अनेक देशांतील चलनी नोटा जप्त !

पुणे – स्वारगेट पोलिसांनी बांगलादेशी घुसखोर एहसान शेख याला काही दिवसांपूर्वी अटक केली होती. त्याच्याकडून ८ पॅनकार्ड, १५ आधारकार्ड, २ मतदान ओळखपत्र, वाहन चालवण्याचे २ परवाने, ३ पारपत्र (पासपोर्ट), ९ डेबिट कार्ड, ८ क्रेडिट कार्ड, ७ उद्योग आधारपत्र (शॉपअ‍ॅक्ट), शाळा सोडल्याचे ३ दाखले आणि ८ जन्मदाखले अशी कागदपत्रे जप्त करण्यात आली आहेत. आरोपीकडून पाकिस्तान, सौदी अरेबिया, कुवैत, कतार, यूएई आणि मलेशिया या देशांच्या चलनी नोटाही पोलिसांनी जप्त केल्या आहेत. अशा घुसखोरांना अशा प्रकारची कागदपत्रे सिद्ध करून देणार्‍यांना अटक करण्यात येणार आहे. एहसान याने अनेक नावे धारण करून सर्व कागदपत्रे गोळा केल्याचे उघड झाले आहे.

एहसान हा बांगलादेशी असल्याचा संशय आल्याने ‘पतित पावन संघटना’, ‘क्रांतीवीर सेना’ आणि ‘सकल हिंदु समाज’ आदी विविध संघटनांच्या कार्यकर्त्यांनी त्याला पकडून पोलिसांच्या स्वाधीन केले.

आरोपी बांगलादेशातील मैमनसिंह जिल्ह्यातील सोनकंदा बाजार येथे रहाणारा आहे. वर्ष २००४ मध्ये दलालांच्या साहाय्याने भारतामध्ये घुसखोरी केली. प्रथम कोलकाता नंतर कर्णावती, तसेच मुंबई येथे राहिला. वर्ष २००९ मध्ये तो भोसरी येथे कामासाठी आला. वर्ष २०१२ पासून तो सहकारनगर भागातील महर्षिनगर येथे रहात होता.