छत्रपती संभाजीनगर येथील मध्य मतदारसंघात तिरंगी लढत होणार !

छत्रपती संभाजीनगर – खासदार असदुद्दीन ओवैसी यांच्या एम्.आय.एम्. पक्षाच्या वतीने संभाजीनगर मध्य मतदारसंघात या वेळी इम्तियाज जलील यांच्या ऐवजी नासेर सिद्दिकी यांना उमेदवारी देण्यात आली आहे. पक्षाच्या वतीने ओवैसी यांनी त्यांच्या नावाची घोषणा केली. त्यामुळे आता मध्य मतदारसंघात शिवसेनेचे विद्यमान आमदार प्रदीप जयस्वाल यांच्याविरुद्ध उद्धव ठाकरे गटाचे किशनचंद तनवाणी आणि ‘एम्.आय.एम्.’चे नासेर सिद्दिकी अशी तिरंगी लढत होणार आहे.

या मतदारसंघांमध्ये शिवसेना विरुद्ध भाजप आणि एम्.आय.एम्. अशी तिरंगी लढत वर्ष २०१४ मध्ये झाली होती. त्या वेळी शिवसेना विरुद्ध भाजप यांच्यामध्ये झालेल्या मतविभाजनाचा लाभ एम्.आय.एम्. पक्षाला झाला होता; मात्र वर्ष २०१९ च्या निवडणुकीत पुन्हा एकदा या मतदारसंघात शिवसेना विजयी झाली; मात्र त्यानंतर शिवसेनेचे विभाजन झाले आणि या मतदारसंघातील विद्यमान आमदार प्रदीप जयस्वाल हे मुख्यमंत्री एकनाथ शिंदे यांच्यासमवेत सत्तेत सामील झाले.