‘पंचमहाभूते सच्चिदानंद परब्रह्म डॉ. आठवले यांच्या आज्ञेत आहेत’, याची ‘वैश्विक हिंदु राष्ट्र महोत्सवा’च्या काळात आलेली प्रचीती !

‘२४.६ ते ३०.६.२०२४ या काळात गोव्यामध्ये ‘वैश्विक हिंदु राष्ट्र महोत्सव’ पार पडला. त्यासाठी देश-विदेशातील वेगवेगळ्या ठिकाणांहून अनेक हिंदुत्वनिष्ठ गोव्याला आले होते. ‘आपत्काळात पंचमहाभूते भक्तांचे रक्षण करतील’, असे सच्चिदानंद परब्रह्म डॉ. आठवले यांनी सांगितले होते. ‘सर्व पंचमहाभूते गुरुदेवांच्या आज्ञेत आहेत’, याची प्रचीती या महोत्सवाच्या कालावधीत आम्ही सर्वांनी घेतली.

जून मासात गोव्यात अतीवृष्टी होत असते आणि त्याच कालावधीत महोत्सवही असतो. गोव्यात दिवसरात्र पाऊस असतो; पण महोत्सवाला प्रारंभ झालेल्या दिवसापासून ते शेवटच्या दिवसापर्यंत ‘वरुणदेवता गुरुदेवांच्या आज्ञेचे पालन करत आहे’, असे मला वाटले. सकाळी साडेआठ वाजता जेव्हा मान्यवर त्यांच्या निवास स्थानापासून रामनाथ देवस्थान येथील सभागृहाकडे यायचे, तेव्हा पाऊस थांबलेला असायचा. रात्री महाप्रसाद घेऊन जेव्हा मान्यवर निवासस्थानी परत जायचे, तेव्हाही पाऊस थांबलेला असायचा; मात्र एरव्ही दिवसरात्र पुष्कळ पाऊस पडायचा. असे लागोपाठ ८ दिवस मला अनुभवता आले. मान्यवरांनीही ही अनुभूती घेतली. ‘सर्वज्ञ’ आणि ‘सर्वशक्तीमान’ असलेल्या श्री गुरूंच्या चरणी कितीही वंदन किंवा कृतज्ञता व्यक्त केली, तरी ती अल्पच आहे.’

– सौ. क्षिप्रा जुवेकर (आध्यात्मिक पातळी ६३ टक्के), जळगाव, महाराष्ट्र. (४.७.२०२४)