देवस्थानांच्या भूमी हडपणार्‍या भूमाफियांना रोखण्यासाठी महाराष्ट्रात ‘अँटी लँड ग्रॅबिंग’ ॲक्ट लागू करा ! – सुनील घनवट, राष्ट्रीय संघटक, मंदिर महासंघ

देशभरातील सरकारीकरण झालेली मंदिरे सरकारमुक्त करण्याची मंदिर महासंघाची मागणी

अमरावती (वार्ता.) – अमरावतीसह विदर्भातील अनेक सार्वजनिक मंदिर ट्रस्टच्या भूमी काही महसूल अधिकारी, बिल्डर लॉबी यांच्याशी संगनमत करून हडपण्यात आलेल्या आहेत. या विरोधात महाराष्ट्र शासनाने तात्काळ ‘अँटी लँड ग्रॅबिंग’ (भूमी चोरी प्रतिबंध) कायदा करावा. ज्यांनी मंदिरांच्या भूमी बळकावल्या, त्या मुक्त करून मंदिरांच्या कह्यात द्याव्यात. मंदिरांचे पावित्र्य राखणे हे आपले कर्तव्य आहे. कुठल्याही अहिंदूंच्या कृतीमुळे मंदिरातील पावित्र्य नष्ट होत असल्याचे वाटत असेल, तर अयोग्य गोष्टींना प्रतिबंध करावा, अशी मागणी यांनी केली. या मागणीसह मंदिर सुरक्षा, मंदिर समन्वय, मंदिर धर्मप्रचाराचे केंद्र व्हावे, तसेच युवा संघटन या विषयांवरील मागण्यांसाठी महाराष्ट्र मंदिर न्यास अधिवेशन पार पडले. अधिवेशनाच्या उद्घाटनप्रसंगी ते बोलत होते. अधिवेशनामध्ये मठ-मंदिराचे विश्वस्त, पुजारी, प्रतिनिधी असे ४५० हून अधिक जण उत्स्फूर्तपणे सहभागी झाले होते.

अधिवेशनाचे आयोजन महाराष्ट्र मंदिर महासंघाच्या वतीने श्री महारुद्र हनुमान मंदिर, जहागीरपूर येथे करण्यात आले होते. अधिवेशनाचे सहआयोजक म्हणून श्री महारुद्र हनुमान मंदिर, जहागीरपूर; श्री पिंगळादेवी संस्थान, नेरपिंगळाई; श्री नागेश्वर  महादेव संस्थान, धामंत्री; देवस्थान सेवा समिती, विदर्भ आणि हिंदु जनजागृती समिती सहभागी झाले होते.

या वेळी व्यासपिठावर महारुद्र मारुति देवस्थानाचे अध्यक्ष श्री. ओम प्रकाश परतानी, महंत श्री पंचदशनाम आखाडा कैलास आश्रम वरुडचे पू. वसुदेवनंद गिरी महाराज, पू. श्री जनार्दन पंत बोथे – अखिल भारतीय गुरुदेव सेवा मंडळ, राष्ट्रीय सरचिटणीस, सनातन संस्थेचे धर्मप्रसारक पू. अशोक पात्रीकर, पू. जयगिरी महाराज, महाराष्ट्र मंदिर महासंघाचे राष्ट्रीय संघटक श्री. सुनील घनवट, श्री. संदीप दौंडकर आदी मान्यवर उपस्थित होते. मान्यवरांच्या हस्ते दीपप्रज्वलन करून अधिवेशनाचा प्रारंभ करण्यात आला.

मंदिर महासंघाला ‘अधिकृत संघटना’ म्हणून घोषित करण्याची मागणी !

‘मंदिरे ही सनातन धर्मप्रचाराचे केंद्र होणे आवश्यक असून यासाठी १५ सहस्र मंदिरांचे संघटन झालेले आहे. या संघटनाच्या माध्यमातून मंदिरांच्या समस्या सोडवणे आणि मंदिर महासंघाला ‘अधिकृत संघटना’ म्हणून घोषित करावे, ही मागणी शासनाकडे करण्यात येत आहे’, असेही श्री. सुनील घनवट म्हणाले.

विश्वस्तांनी मंदिराचे कार्य प्रामाणिकपणे करावे ! – ओमप्रकाश परताणी, अध्यक्ष, श्री महारुद्र मारुति संस्थान, जहागिरपूर

ज्याच्या हातून मंदिर जीर्णोद्धाराचे कार्य निःस्वार्थ भावाने आणि मनोभावे होते, त्यांना मोक्षप्राप्ती होते, तरी सर्व विश्वस्तांनी मंदिराचे कार्य प्रामाणिकपणे करावे. महाराष्ट्र मंदिर समितीचे कार्य निःस्वार्थपणे चालू असल्याने आम्ही त्यांना सहकार्य करण्यासाठी कटिबद्ध आहोत.

मंदिरांचा धर्मकार्यातील सहभाग दिवसेंदिवस वाढवावा लागेल ! – पू. अशोक पात्रीकर, धर्मप्रचारक, सनातन संस्था

मंदिरे, धर्मकार्य, धर्मशास्त्र आणि अध्यात्म यांची सांगड घालणारे आदर्श उदाहरण म्हणजे छत्रपती शिवाजी महाराज ! देशातील मंदिरांचे व्यवस्थापन आणि त्या मंदिरांचा धर्मकार्यात असलेला सहभाग दिवसेंदिवस वाढवावा लागणार आहे. त्याच उद्देशाने मंदिर न्यास अधिवेशन घेण्यात येत असून यात प्रत्येकाने सक्रियपणे सहभागी व्हावे.

न्यूनगंड न बाळगता धर्मकार्य करा ! – पू. श्री जनार्दन बोथे गुरुजी, अखिल भारतीय गुरुदेव सेवा मंडळाचे राष्ट्रीय सचिव

‘जागो । अपने धर्म को जगावो ।’ असे भजन आहे. आपणही याप्रमाणे धर्मकार्य करावे. आज ‘मी हिंदु आहे’, अशी स्वतःची ओळख करून देण्याची आपल्याला लाज वाटते. धर्माकडे दुर्लक्ष झाल्याने ही स्थिती निर्माण झाली आहे. आज आपल्या धर्मात ‘विश्वगुरु’ बनण्याचे सामर्थ्य आहे. त्यामुळे न्यूनगंड न बाळगता धर्मकार्य करा.

हिंदु धर्म, गोमाता, मंदिर आणि राष्ट्र यांच्या रक्षणाचा संकल्प करा ! – संदीप दौंडकर, उपाध्यक्ष, रांजणगाव गणपति मंदिर

देवदर्शनासाठी येणारा कुणीही ‘व्हीआयपी’ नसून येणारा प्रत्येक भाविक समान आहे. या तत्त्वानुसार आम्ही आमच्या मंदिरात ‘व्हीआयपी’ दर्शन पद्धत बंद केली. छत्रपती संभाजी महाराजांचा बलीदान मास आणि मंदिर अधिवेशन येथे पार पडत आहे, हे आपल्या सर्वांचे परमभाग्य आहे; म्हणूनच महाराजांचा आदर्श समोर ठेवून सर्वांनी एकत्रितरित्या काम करून हिंदु धर्म, गोमाता, मंदिर, आणि राष्ट्र यांचे संरक्षण करण्याचा संकल्प करा.