खासदार संजय राऊत आणि आमदार रोहित पवार यांच्या विरोधात मंत्री जयकुमार गोरे यांच्याकडून हक्कभंग !

मुंबई, ६ मार्च (वार्ता.) – माध्यमांमध्ये अपकीर्ती केल्याच्या कारणावरून ६ मार्च या दिवशी विधानसभेत ग्रामविकासमंत्री जयकुमार गोरे यांनी खासदार संजय राऊत, शरदचंद्र पवार पक्षाचे आमदार रोहित पवार आणि ‘लय भारी’ यू ट्यूब वाहिनीचे संपादक तुषार खरात यांच्या विरोधात हक्कभंगाचा प्रस्ताव मांडला. अध्यक्ष राहुल नार्वेकर यांनी हक्कभंगाचा प्रस्ताव स्वीकारून निर्णयासाठी विधीमंडळाच्या हक्कभंग समितीकडे पाठवला आहे.

‘संजय राऊत आणि रोहित पवार यांनी प्रसिद्धीमाध्यमांपुढे माझी अपकीर्ती केली, तर ‘लय भारी’ यू ट्यूब वाहिनीवरून सातत्याने माझी अपकीर्ती करणारे व्हिडिओ प्रसारित करण्यात आले. पत्रकारितेमध्ये टीका करतांना भाषेचा स्तर राखला पाहिजे. ‘लय भारी’ यू ट्यूब चॅनेलवरून तो राखला गेला नाही. त्यामुळे हक्कभंग आणत असल्याचे मंत्री जयकुमार गोरे यांनी सभागृहात म्हटले.