केदारनाथ मंदिरातील गर्भगृहात अतीमहनीय व्यक्तींनाच प्रवेश : पुजार्‍यांचा आक्षेप  

केदारनाथ (उत्तराखंड) – येथील केदारनाथ मंदिरातील भाविकांची वाढती गर्दी पहाता सर्वसामान्य भाविकांना मंदिराच्या गर्भगृहात प्रवेश बंद करण्यात आला आहे; मात्र अतीमहनीय व्यक्तींना गर्भगृहात प्रवेश दिला जात आहे. हे निर्बंध परंपरेच्या विरोधात असल्याचा आरोप चारधाम महापंचायतीचे उपाध्यक्ष आणि केदारनाथ तीर्थक्षेत्राचे पुजारी श्री. संतोष त्रिवेदी यांनी केला.

श्राद्ध पक्षाच्या कालावधीत केदारनाथ मंदिरात पूजा करण्याचे विशेष महत्त्व आहे. यासाठी दूरदूरवरून लोक येथे येतात. मंदिराच्या गर्भगृहात प्रवेश बंद करण्याच्या विरोधात संपूर्ण तीर्थ पुरोहित समाज एकवटला असल्याचे श्री. संतोष त्रिवेदी यांनी सांगितले.