श्रीमती शोभा चांदणे यांना हनुमान जयंतीच्या दिवशी सूक्ष्मातून दिसलेले दृश्य !

१. हनुमान जयंतीच्या दिवशी ‘सकाळी ढगांमध्ये शेषासनावर परात्पर गुरु डॉ. आठवले विराजमान आहेत आणि त्यांच्या बाजूला श्रीसत्‌शक्ति (सौ.) बिंदा सिंगबाळ अन् श्रीचित्‌शक्‍ति (सौ.) अंजली गाडगीळ उभ्या आहेत’, असे दिसणे

‘परात्पर गुरु डॉ. आठवले यांच्या जन्मोत्सवाच्या कार्यक्रमाआधी सकाळी ६.४५ वाजता मी खोलीबाहेरील आगाशीत आले. त्या दिवशी हनुमान जयंती होती. माझे लक्ष आकाशाकडे गेले. त्या वेळी सूर्यदेव पांढर्‍या गोळ्याप्रमाणे दिसत होता. त्याच्या बाजूला असलेल्या पांढर्‍या ढगांमध्ये शेषासनावर परात्पर गुरु डॉ. आठवले विराजमान असून त्यांच्या बाजूला श्रीसत्‌शक्ति (सौ.) बिंदा सिंगबाळ अन् श्रीचित्‌शक्‍ति (सौ.) अंजली गाडगीळ उभ्या होत्या.

२. ‘ढगांपासून गरुडाची आकृती निर्माण होऊन त्यावर परात्पर गुरु डॉ. आठवले बसले आहेत’, असे दिसणे आणि ‘ते साधकांच्या रक्षणासाठी पृथ्वीवर आले आहेत’, असे वाटणे

‘थोड्या वेळाने त्याच ढगांपासून गरुडाची आकृती निर्माण झाली आणि त्यावर परात्पर गुरु डॉक्टर बसले होते. तेव्हा ‘परात्पर गुरु डॉक्टर साधकांच्या रक्षणासाठी पृथ्वीवर आले आहेत’, असा माझ्या मनात विचार आला. नंतर त्या ढगांपासून मोराची आकृती निर्माण झाली. तेव्हा मोराची पिसेही दिसत होती. त्या वेळी मनात विचार आला, ‘मोरावर बसून देवीही आली आहे.’ मला आतून पुष्कळ आनंद होत होता. तेव्हा माझ्या मनात विचार आला, ‘रामनवमीच्या दिवशी असे दिसले नाही. आज कसे दिसले ?’ तेव्हा आतून उत्तर आले, ‘देव भक्तासाठी धावून येतो; म्हणून ‘हनुमान जयंती’च्या दिवशी देवाने दर्शन दिले.’

– श्रीमती शोभा चांदणे, सनातन आश्रम, मिरज

सूक्ष्म : व्यक्तीचे स्थूल म्हणजे प्रत्यक्ष दिसणारे अवयव नाक, कान, डोळे, जीभ आणि त्वचा ही पंचज्ञानेंद्रिये आहेत. ही पंचज्ञानेंद्रिये, मन आणि बुद्धी यांच्या पलीकडील म्हणजे ‘सूक्ष्म’. साधनेत प्रगती केलेल्या काही व्यक्तींना या ‘सूक्ष्म’ संवेदना जाणवतात. या ‘सूक्ष्मा’च्या ज्ञानाविषयी विविध धर्मग्रंथांत उल्लेख आहेत.

सूक्ष्मातील दिसणे, ऐकू येणे इत्यादी (पंच सूक्ष्मज्ञानेंद्रियांनी ज्ञानप्राप्ती होणे) : काही साधकांची अंतर्दृष्टी जागृत होते, म्हणजे त्यांना डोळ्यांना न दिसणारे दिसते, तर काही जणांना सूक्ष्मातील नाद किंवा शब्द ऐकू येतात.