सिंहगडावर विदेशी पर्यटकासमवेत गैरवर्तन करणार्‍या ४ तरुणांवर गुन्हा नोंद !

पुणे – हवेली पोलिसांनी दिलेल्या माहितीनुसार ३ एप्रिल या दिवशी न्यूझीलंड येथून आलेला परदेशी पर्यटक सिंहगडावर ‘ट्रेक’ (गडावर किंवा उंच डोंगरावर चढाई करणे) करायला गेला होता. त्या वेळी छत्रपती संभाजीनगर येथील मुलांचा गट ट्रेक करत होता. या मुलांनी परदेशी पर्यटकाला मराठीतील अश्लील आणि गलिच्छ शिव्या द्यायला लावल्या. या घटनेचा व्हिडिओ प्रसारमाध्यमांद्वारे प्रसारित झाला. या घटनेविषयी खेद व्यक्त करत गडप्रेमींनी पुणे येथील विविध पोलीस ठाण्यांत आणि उद्धव ठाकरे गट अन् मनसे यांच्या वतीने (खडकवासला) हवेली पोलीस ठाण्यात संबंधित तरुणांवर कारवाई करण्यासाठी निवेदन दिले आहे.