औरंगजेबाच्या कबरीसाठी आता सैन्यदलाला बोलवावे लागेल !

विधान परिषदेचे विरोधी पक्षनेते अंबादास दानवे यांची सरकारवर टीका

मुंबई, २१ मार्च (वार्ता.) – राज्यात सध्या औरंगजेबाच्या कबरीवरून वातावरण चांगलेच तापलेले आहे. ‘छत्रपतींच्या आशीर्वादावर सरकार चालते’, असे सरकार म्हणते. सत्ताधार्‍यांनी छत्रपती शंभूराजांच्या मारेकर्‍याभोवती जणू किल्लाच (संरक्षणात्मक) उभा केला आहे. कबरीच्या संरक्षणासाठी आता सैन्यदलाला बोलवायचे शेष राहिलेले आहे, असे म्हणत औरंगजेबाच्या कबरीला दिलेल्या सुरक्षेवरून विधान परिषदेचे विरोधी पक्षनेते अंबादास दानवे यांनी सरकारवर टीका केली आहे.

राष्ट्रीय अन्वेषण यंत्रणेचे पथक छत्रपती संभाजीनगर येथे !

औरंगजेब कबरीवरून चालू असलेल्या वादामुळे नागपुरात दंगल झाली. मराठवाड्यातही तणाव निर्माण होण्याची चिन्हे आहेत. त्यामुळे राष्ट्रीय अन्वेषण यंत्रणेचे (एन्.आय.ए) देहलीचे एक पथक २० मार्चला छत्रपती संभाजीनगर शहरात आले आहे. राज्यभरात हिंदुत्वनिष्ठ संघटनांकडून खुलताबाद येथील कबर हटवण्यासाठी आंदोलने चालू आहेत.