Revanth Reddy : ‘माझ्या कुटुंबियांविरुद्ध बोललात, तर विवस्त्र करून रस्त्यावर चोप देईन !’

भाग्यनगर (तेलंगाणा) – माझ्या कुटुंबियांविरुद्ध काही बोललात, तर विवस्त्र करून रस्त्यावर चोप देईन, अशा शब्दांत काँग्रेसशासित तेलंगाणाचे मुख्यमंत्री रेवंत रेड्डी यांनी त्यांच्यावर टीका करणार्‍यांना धमकी दिली.

‘पल्स न्यूज’ नावाच्या यू ट्यूब वाहिनी चालवणार्‍या रेवती पोगदंडा आणि त्यांच्या सहकारी संध्या उपाख्य तन्वी यादव यांनी मुख्यमंत्री रेड्डी अन् त्यांच्या कुटुंबियांविषयी आक्षेपार्ह पोस्ट प्रसारित केली होती. या प्रकरणी पोलिसांनी १० मार्चला दोघींविरुद्ध गुन्हा नोंदवून १२ मार्चला त्यांना अटक केली.

पोलिसांचे म्हणणे आहे की, या दोन्ही महिलांनी राज्यातील मुख्य विरोधी पक्ष असलेल्या बी.आर्.एस्. पक्षाच्या (भारत राष्ट्र समिती या पक्षाच्या) कार्यालयात या व्हिडिओचे चित्रीकरण केले आहे. कुटुंबियांवर झालेल्या टीकेमुळे रेड्डी चांगलेच संतप्त झाले.

मुख्यमंत्री रेड्डी पुढे म्हणाले की,

१. माझ्या आणि माझ्या कुटुंबातील सदस्यांविषयी अत्यंत अपमानास्पद भाषेत पोस्ट करण्यात आली. माझ्या कुटुंबातील महिलांविरुद्ध सामाजिक माध्यमांतील या पोस्टमध्ये वापरल्या जाणार्‍या भाषेमुळे माझे रक्त उसळत आहे.

२. ‘मी मुख्यमंत्री आहे म्हणून गप्प बसीन’, असे समजू नका. मी तुम्हाला विवस्त्र करून चोप देईन. माझ्या आज्ञेनुसार तुम्हाला मारण्यासाठी लाखो लोक रस्त्यावर उतरतील. माझ्या स्वभावामुळे मी सहनशील रहातो. तथापि मी जे काही करीन, ते कायद्याच्या कक्षेत राहून करीन.

३. मी सार्वजनिक जीवनात वावरत असल्याने टीकेसाठी सदैव सिद्ध असतो; पण माझ्या कुटुंबातील सदस्यांना का लक्ष्य केले जाते ? पत्रकारितेच्या नावाखाली सामाजिक माध्यमांत अपमानास्पद मजकूर पसरवण्याची कुप्रथा संपेपर्यंत मी गप्प बसणार नाही. सामाजिक माध्यमांवर खोट्या बातम्या पसरवणार्‍यांना सोडणार नाही.