रामनाथी, गोवा येथील सनातनच्या आश्रमात झालेल्या ‘देवी होमा’चे सूक्ष्म परीक्षण !

‘२.२.२०२५ या दिवशी महर्षींच्या आज्ञेने रामनाथी, गोवा येथील सनातनच्या आश्रमात परात्पर गुरु डॉ. आठवले यांच्या दीर्घायुष्यासाठी ‘आयुष्य होम’ आणि अनिष्ट शक्तींच्या त्रासांच्या निवारणासाठी ‘देवी होम’ हे २ होम करण्यात आले. यांपैकी ‘देवी होमा’च्या वेळी मला देवाच्या कृपेमुळे सूक्ष्म परीक्षण करता आले. ते येथे दिले आहे.

१. ध्यानस्थ भगवान शिवाचे दर्शन होणे 

‘देवी होम’ चालू असतांना मला यज्ञकुंडाच्या वर २ फूट अंतरावर ध्यानस्थ भगवान शिवाचे दर्शन झाले. त्याच्या ओंजळीत पणतीत तेवत असलेल्या ज्योतीप्रमाणे एक ज्योत दिसली. ही ज्योत पाहून मला प्रश्न पडला, ‘ही ज्योत कसली आहे ?’

२. भगवान शिव परात्पर गुरु डॉ. आठवले यांचे रक्षण करत असणे 

तेव्हा माझ्या मनात विचार आला, ‘ती परात्पर गुरु डॉक्टरांची प्राणज्योत असून तिचे रक्षण स्वतः शिवच करत आहे. परात्पर गुरु डॉक्टरांवर सूक्ष्मातून अनिष्ट शक्तींची पुष्कळ आक्रमणे होत असतात. त्याविषयी साधकांनी कुठलीच चिंता करण्याची आवश्यकता नाही.’ काही सेकंदांनंतर शिवाच्या हातातील ज्योत शिवाच्या हृदयस्थानी दिसली.

यापूर्वी देवाच्या कृपेमुळे मला अनेक यागांचे सूक्ष्म परीक्षण करता आले. प्रत्येक याग चालू असतांना नेहमी मला ‘अग्निदेव आणि स्वर्गलोकातून यागाच्या ठिकाणी आलेल्या देवता’ यांचे सूक्ष्मातून दर्शन होत असे. या वेळी प्रथमच मला यागाच्या वेळी सूक्ष्मातून भगवान शिवाचे दर्शन झाले.’

– श्री. राम होनप, सनातन आश्रम, रामनाथी, गोवा. (३.२.२०२५)