आळंदी (पुणे) येथे ७ सहस्र श्री गणेशमूर्तींचे संकलन

आळंदी – नगर परिषदेच्या आवाहनास प्रतिसाद देत अनुमाने ७ सहस्र श्री गणेशमूर्तींचे नदीकाठीच नगर परिषदेच्या वतीने उभारलेल्या मूर्तीसंकलन केंद्रात संकलन करण्यात आले. (दान केलेल्या मूर्ती खाणीत टाकल्या जातात. रस्ता बुजवण्यासाठी मूर्तीचा वापर केला जातो. नाल्यामध्ये मूर्तींचे विसर्जन केले जाते, असे लक्षात आले आहे. त्यामुळे श्री गणेशमूर्ती देऊन भाविकांनी श्री गणेशाची कोणती कृपा संपादन केली आहे ? याचा त्यांनी विचार करायला हवा ! – संपादक)

गेल्या १२ वर्षांपासून आळंदी नगर परिषद मूर्तीसंकलन करत आहे. नदीप्रदूषण टाळण्यासाठी इंद्रायणी नदीवरील दगडी घाट विसर्जन काळात बंद केला होता. इंद्रायणीकडे जाण्यास मज्जाव होता. त्याऐवजी शहरात ६ ठिकाणी मूर्तीसंकलन केंद्रे उभी केली. पाण्याच्या कृत्रिम हौदात मूर्तीसंकलन केले जात होते. मूर्तीची आरती करून हौदामध्ये विसर्जन करून मूर्तीदान केले जात होते. यासाठी नगर परिषदेला ५ लाखांचा व्यय करावा लागला.