अयोध्यानगरीत २२ जानेवारी या दिवशी सुवर्ण अक्षरांनी इतिहास लिहिला जाणार : श्री रामललाच्या मूर्तीची प्राणप्रतिष्ठा !

• श्रीरामाच्या स्वागतासाठी अयोध्यानगरी सज्ज !

• ऐतिहासिक श्रीराममंदिराचेही होणार उद्घाटन !

• सहस्रो साधू, संत, महंत यांचे अयोध्येत आगमन !

• हिंदूंची ५०० वर्षांची प्रदीर्घ प्रतीक्षा संपुष्टात !

• असंख्य कारसेवकांच्या बलीदानाचे सार्थक !

अशी सजली आहे अयोध्यानगरी !

१. अयोध्यानगरीच्या प्रवेशद्वारावरच भाविकांच्या स्वागतासाठी सुर्यदेवाची मूर्ती असलेली भव्य कमान लावण्यात आली आहे. सप्तअश्‍वांवर विराजमान सुर्यदेवाची ही भव्य मूर्ती सर्वांचे लक्ष वेधून घेत आहे. श्रीराम रघुवंशीय असल्याने त्याचे प्रतीक म्हणून ही मूर्ती येथे बसवण्यात आली असल्याचे या वेळी सांगण्यात आले.

२. कमानीतून आत प्रवेश केल्यावर दोन्ही बाजूंनी रस्त्याच्या कडेला असलेल्या भिंतींवर रामायणातील विविध प्रसंगांची शिल्पे कोरण्यात आली आहेत.

३. रस्त्याच्या मधोमध असलेल्या दुभाजकांवर दिव्यांचे अनेक खांब उभारण्यात आले आहेत. हे खांब अत्यंत वैशिष्ट्यपूर्ण पद्धतीने सजवण्यात आले आहेत. प्रत्येक खांबावर पिवळ्या रंगातील सुर्याची प्रतिकृती बसवण्यात आली आहे. याखेरीज या खांबावर श्री हनुमंताची गदा कोरण्यात आली असून त्याच्या वरच्या बाजूला ‘जय श्रीराम’ अशी अक्षरेही कोरण्यात आली आहेत. या खांबांसह रस्त्याच्या दुतर्फा, तर्सच प्रत्येक चौकाची झेंडूच्या आकर्षक फुलांनी सजावट करण्यात आली आहे.

४. अयोध्येतील प्रत्येक चौक, प्रत्येक दुकान, प्रत्येक ठिकाण, तसेच घराघरांवर भगवे झेंडे लावण्यात आले असून त्यावर भगवान श्रीरामाचा आणि श्रीराममंदिराचे छायाचित्र आहे.

५. सरकारने मंदिरापासून दूरपर्यंत ठिकठिकाणी ध्वनीक्षेपक यंत्रणा लावली असून त्यावर श्रीरामाची गीते लावण्यात येत आहेत.

६. या सर्वांमुळे अवघी अयोध्यानगरी राममय झाली असून प्रत्येकालाच आता श्रीरामाच्या आगमनाची ओढ लागली आहे.

७. सर्वांच्या मुखी केवळ आणि केवळ ‘जय श्रीराम’ची घोषणा आहे.

अयोध्येत श्री रामललाचे अवतरण, ही जणू रामराज्यरूपी हिंदु राष्ट्र्राचीच नांदी !

त्रेतायुगात रावणाचा वध करून प्रभु श्रीराम अयोध्येत परतले आणि कलियुगात हिंदूंनी ५०० वर्षांच्या केलेल्या प्रदीर्घ संघर्षानंतर आज रामलला श्रीरामजन्मभूमीवरील भव्य मंदिरात विराजमान होत आहेत. त्रेतायुगात अयोध्यावासियांनी प्रत्यक्ष सगुण रूपातील श्रीराम पाहिले, तर कलियुगातील, म्हणजे सध्याचे आपण सर्व श्रीरामभक्त निर्गुण स्वरूपातील श्रीरामतत्त्व अनुभवत आहोत. त्रेतायुगात प्रभु श्रीराम परतल्यानंतर रामराज्य अवतरले, त्याचप्रमाणे अयोध्येत श्रीरामललाचे अवतरण ही जणू रामराज्यरूपी हिंदु राष्ट्राचीच नांदी आहे. येथे आलेले साधू-संतसुद्धा हेच सांगत आहेत. याचीच अनुभूती सध्या अयोध्येतील प्रत्येक हिंदू घेत आहे.