अमेरिकी विश्‍वविद्यालयांमध्ये विद्यार्थ्यांच्या रंगावर आधारित प्रवेश दिला जाणार नाही !

वॉशिंग्टन (अमेरिका) – अमेरिकेच्या सर्वोच्च न्यायालयाने तेथील विश्‍वविद्यालयांमधील प्रवेशासंबंधी एक महत्त्वपूर्ण आदेश दिला आहे. न्यायालयाने म्हटले की, यापुढे विश्‍वविद्यालयांमध्ये वर्णावर (व्यक्तीच्या रंगावर) आधारित प्रवेश दिला जाणार नाही ! या निर्णयाला ‘ऐतिहासिक’ म्हटले जात असून याआधी वर्ष १९६० च्या दशकामध्ये विश्‍वविद्यालयांत प्रवेश घेतलेल्या विद्यार्थ्यांमध्ये विविधता येण्यासाठी वर्णावर आधारित प्रवेश देण्यास आरंभ करण्यात आला होता. गेली ६० वर्षे हेच कारण देत या नियमाचे संरक्षण करण्यात आले होते. आता मात्र हार्वर्ड आणि नॉर्थ कॅरोलिना या विश्‍वविद्यालयांच्या संबंधीच्या दोन याचिकांवर निकाल देतांना न्यायालयाने हा नियम रहित केला आहे.

Race cannot be a factor in determining admissions to colleges and universities in the United States , the Supreme Court has said

(@prashantktm reports)https://t.co/z83iDEeyx7

— Hindustan Times (@htTweets) June 29, 2023

अमेरिकेच्या राष्ट्राध्यक्षांचा विरोध

अनेकांनी या निर्णयाचे स्वागत केले असले, तरी अनेक जण यास विरोधही करत आहेत. अमेरिकी राष्ट्राध्यक्ष जो बायडेन म्हणाले की, आम्ही या निर्णयाला अंतिम निर्णय बनू देणार नाही. अमेरिकेत अजूनही भेदभाव आहे. निकाल देणार्‍या ९ न्यायमूर्तींच्या खंडपिठातील ६ न्यायमूर्ती हे रुढीवादी, तर ३ न्यायमूर्ती उदारमतवादी विचारसरणीचे आहेत.