Jitendra Awhad On Malhar Certification : (म्हणे) ‘मल्हार’ मटण म्हणजे प्रसिद्धीसाठी केलेला ‘स्टंट’ !’ – आमदार जितेंद्र आव्हाड

मुंबई – ‘हलाल’ हे धार्मिक प्रमाणपत्र आहे. ते ‘हायजिन’ (आरोग्याचे) प्रमाणपत्र नाही. हिंदूंना हलाल मांस खाणे बंधनकारक नाही. जसजसा काळ पालटला, खाण्याच्या पद्धती पालटल्या, तरीही भारतातील ९५ टक्के लोक मांसाहार करतात. त्यांना जर विचारले की, तुम्ही आणलेले मटण ‘हलाल’ आहे कि ‘झटका’ ? तर त्यांना ते सांगता येणार नाही. त्यामुळे एखाद्या मटणाला ‘मल्हार’ मटण म्हटले काय, ‘झटका’ मटण म्हटले काय किंवा ‘हलाल’ मटण म्हटले काय, त्याचा फारसा परिणाम मटणाच्या गुणवत्तेवर होणार नाही अन् खाणार्‍यावरही होणार नाही. त्यामुळे हा केवळ प्रसिद्धीसाठी केलेला ‘स्टंट’ (दिखाऊपणा) आहे, असे विधान राष्ट्रवादी काँग्रेस (शरद पवार) पक्षाचे नेते जितेंद्र आव्हाड यांनी केले. (तिन्ही संकल्पनांची मुद्दामहून सरमिसळ करून हिंदूंची फसवणूक करायची आणि मुसलमानांना मात्र पाठबळ द्यायचे, हे आव्हाड महाशयांना चांगले जमत असले, तर हिंदू आता सतर्क झाले आहेत, हे आव्हाड यांनी लक्षात ठेवावे ! – संपादक) मटणातील भेसळ रोखण्यासाठी ‘मल्हार सर्टिफिकेशन डॉट कॉम’ संकेतस्थळाचे उद्घाटन मत्स्यव्यवसाय आणि बंदरे विकास मंत्री नितेश राणे यांच्या हस्ते करण्यात आले. त्या पार्श्‍वभूमीवर आव्हाड यांनी वरील विधान केले.

आम्ही शाहू, फुले, आंबेडकर यांची विचारसरणी पाळणार ! – आमदार अमोल मिटकरी

राष्ट्रवादी काँग्रेस अजित पवार गटाचे आमदार अमोल मिटकरी म्हणाले, ‘नितेश राणे यांना मी काय बोलावे ? ‘मल्हार’ मटणाविषयी ते जे बोलत आहेत, ते त्यांचे वैयक्तिक मत आहे. आमची विचारसरणी शाहू, फुले, आंबेडकर यांची आहे आणि आम्ही ती पाळत राहू.’’