Chatrapati Shivaji Maharaj Mandir Maradepada : मराडे पाडा (भिवंडी) येथे छत्रपती शिवाजी महाराज यांचे महाराष्ट्रातील पहिले मंदिर !

ठाणे : छत्रपती शिवाजी महाराज यांचे महाराष्ट्रातील पहिले मंदिर भिवंडी तालुक्यातील मराडे पाडा या ठिकाणी साकारले जात आहे. १७ मार्च या दिवशी तिथीनुसार असलेल्या छत्रपती शिवरायांच्या जयंतीनिमित्त प्राणप्रतिष्ठा आणि मंदिराचे लोकार्पण करण्यात येईल. त्यासाठी भव्यदिव्य सोहळ्याचे आयोजन करण्यात येणार आहे, अशी माहिती शिवक्रांती प्रतिष्ठानचे संस्थापक अध्यक्ष राजूभाऊ चौधरी यांनी दिली. महाराजांचे हे मंदिर गडदुर्गांसारखे दिसावे; म्हणून दीड एकर जागेत उभारलेल्या मंदिराच्या भोवती तटबंदी आणि भव्य प्रवेशद्वार उभारण्यात आले आहे.

‘हे मंदिर केवळ दर्शनस्थळ न बनता शक्तिपीठ असावे. महाराजांचे जीवन समाजातील सर्व वर्गांसाठी प्रेरणादायी राहील’, हे लक्षात घेऊन मंदिर उभारणीचा संकल्प केला होता’, अशी माहिती राजूभाऊ चौधरी यांनी दिली.

छत्रपती शिवरायांची वैशिष्ट्यपूर्ण मूर्ती आणि मंदिराची माहिती

मंदिरात शिवरायांची ६ फूट उंचीची सिंहासनारूढ मूर्ती असेल. मंदिराभोवती असलेल्या तटबंदीच्या खालील ३६ चबुतर्‍यांमध्ये छत्रपती शिवाजी महाराज यांच्या विविध इतिहासकालीन प्रसंगांचे देखावे साकारण्यात आले आहेत. या देखाव्यांची माहिती येथे भेट देणार्‍या सर्वभाषिक शिवभक्तांना समजावी, यासाठी मराठी, हिंदी आणि इंग्रजी यांमध्ये चित्राखाली ती लिहिण्यात येणार आहे. अयोध्या येथील श्रीराममंदिरात रामलल्ला यांची मूर्ती साकारणारे म्हैसूर येथील आंतरराष्ट्रीय कीर्तीचे मूर्तीकार अरुण योगीराज यांच्या हातून अखंड कृष्णशिला म्हणजेच काळ्या पाषाणातून ६ फूट उंचीची शिवरायांची मूर्ती साकारण्यात आली आहे. या अखंड दगडातून साकारलेल्या मूर्तीमधून चैतन्य कसे येईल, याची काळजी मूर्ती घडवतांना घेतली गेली आहे, याची माहिती राजूभाऊ चौधरी यांनी दिली.

शिवकालीन शस्त्र प्रशिक्षण आणि वैदिक शिक्षण देण्याचा प्रयत्न !

मंदिर परिसरात केवळ मंदिर नव्हे, तर गुरुकुल पद्धतीने शिक्षण देण्याची सुविधा आणि शस्त्र प्रशिक्षण केंद्र चालू करण्याचा मनोदय आहे. गाभारा सभामंडप परिसर २ सहस्र ५०० चौरस फूट क्षेत्राचा आहे. मंदिराची तटबंदी दीड एकर क्षेत्रात आहे. या ठिकाणी शिवकालीन शस्त्र प्रशिक्षण आणि वैदिक शिक्षण देण्याचा संस्थेचा प्रयत्न आहे. हे मंदिर सर्वांना प्रेरणादायी ठरेल, असा विश्‍वास ‘शिवक्रांती प्रतिष्ठान’चे विश्‍वस्त ह.भ.प. कैलास महाराज नीचीते यांनी व्यक्त केला आहे.

(सौजन्य : jayeshpatil445)