Goa Tamnar Project : पश्चिम घाटातील वनक्षेत्रातून वीजवाहिन्या नेण्यास कर्नाटकचा नकार !

काय आहे गोवा-तमनार वीजवाहिनी प्रकल्प ?

दक्षिण गोव्यातील पुढील १५ ते २० वर्षांची विजेची मागणी पूर्ण करण्यासाठी गोवा सरकार गोवा-तमनार वीजवाहिनी प्रकल्प राबवत आहे. या प्रकल्पाच्या अंतर्गत तमनार (छत्तीसगड) येथून वीज आयात केली जाणार आहे. यासाठी गोवा सरकारने कर्नाटककडे पश्चिम घाटाच्या (यामध्ये काली व्याघ्र संरक्षित क्षेत्राचाही समावेश आहे) १७६.६५ हेक्टर वनक्षेत्रातून ४०० केव्ही वीजवाहिनी घालण्याची अनुमती मागितली आहे. ही वीजवाहिनी कर्नाटकमधील धारवाड, बेळगाव आणि उत्तर कन्नड या ३ जिल्ह्यांतून जाते. या प्रकल्पाला राष्ट्रीय वन्यजीव मंडळाकडून अजूनही संमती मिळायची आहे. प्रारंभी या प्रकल्पाला विरोध झाल्यानंतर प्रकल्पाची वीजवाहिनी घनदाट जंगलातून न नेता अन्य मार्गाने नेण्याचा सुधारित प्रस्ताव कर्नाटककडे ठेवण्यात आला. प्रकल्पाच्या सध्याच्या प्रस्तावानुसार पश्चिम घाट आणि दांडेली वन्यजीव विभाग येथील वनक्षेत्रातील सुमारे ७२ सहस्र झाडे कापावी लागणार आहेत.