मिरज येथे भावपूर्ण आणि उत्साही वातावरणात श्रीराम मंगल अक्षता कलश शोभायात्रा पार पडली !

पालखी, रामनामाचा गजर करत आणि भजने म्हणत शेकडो रामभक्त अन् हिंदुत्वनिष्ठ संघटनांचा सहभाग !

मिरज, १ जानेवारी (वार्ता.) – अयोध्या येथील श्रीराम मंदिर लोकार्पण सोहळ्याच्या निमित्ताने शहरात ३१ डिसेंबर या दिवशी सकाळी ९ वाजता अयोध्या येथून आलेल्या श्रीराम मंगल अक्षता कलश पालखीची भव्य शोभायात्रा भावपूर्ण आणि उत्साही वातावरणात काढण्यात आली. या यात्रेचा प्रारंभ श्री शिवतीर्थापासून होऊन गोठण गल्ली येथील श्रीराम मंदिरात महाआरती करून यात्रेची सांगता झाली. यात्रेचा मार्ग विविध फुले आणि रांगोळी यांनी सजवण्यात आला होता.

उपस्थित हिंदुत्वनिष्ठ संघटना… 

सकल हिंदु समाजाच्या वतीने आयोजित करण्यात आलेल्या या श्रीराम मंगल अक्षता कलश यात्रेचा प्रारंभ श्रीरामाच्या प्रतिमेचे पूजन आणि महाआरती करून झाला. कलश पालखी, श्रीरामाची फुलांनी सजवलेली भव्य प्रतिमा, तसेच टाळ-मृदुंगाचा अन् श्रीरामाचा गजर करत ही यात्रा काढण्यात आली. यामध्ये वारकरी संप्रदाय, इस्कॉन, राष्ट्रीय सेविका समिती, बजरंग दल, हिंदु एकता आंदोलन, विहिंप, राष्ट्रीय स्वयंसेवक संघ, श्री शिवप्रतिष्ठान हिंदुस्थान, सनातन संस्था, हिंदु जनजागृती समिती, प्रजापिता ब्रह्मकुमारी, तसेच शिवसेना, ठाकरे गट, भाजप यांसह अनेक संप्रदाय, संघटना आणि पक्ष यांचे पदाधिकारी अन् कार्यकर्ते मोठ्या संख्येने सहभागी झाले होते.

यात्रेत धनगरी ढोल पथक, वारकरी पथक, छत्रपती शिवाजी महाराज यांची मूर्ती असलेला रथ, ढोल पथक, तुतारी पथक सहभागी झाले होते. अनेक ठिकाणी भाविकांनी या यात्रेचे स्वागत केले. ३१ डिसेंबर आणि १ जानेवारी २०२४ या दिवशी सांगली जिल्ह्यातील सर्व तालुक्यांत अशा पद्धतीने कलश यात्रेचे आयोजन करण्यात आले. १ ते १५ जानेवारी २०२४ या कालावधीत घरोघरी अक्षता पोचवण्यात येणार आहेत.

क्षणचित्रे…

१. यात्रेत श्रीराम, लक्ष्मण, सीता आणि हनुमान यांच्या वेशभूषेत बालचमू सहभागी झाला होता.

२. अनेक ठिकाणी महिलांनी पालखीचे औक्षण करून दर्शन घेतले.

३. यात्रेत पारंपरिक वाद्ये, भगवे झेंडे घेतलेले आणि पारंपरिक वेशभूषा घातलेले भाविक सहभागी झाल्याने संपूर्ण वातावरण हिंदुत्वाने भारलेले वाटत होते.