श्री तुळजाभवानी मंदिरातील भ्रष्टाचाराच्या प्रकरणी मुख्य सचिवांना लक्ष घालण्यास सांगणार !

मुख्यमंत्री एकनाथ शिंदे यांचे आश्वासन

नागपूर, २८ डिसेंबर (वार्ता.) – श्री तुळजाभवानी मंदिरातील कोट्यवधी रुपयांच्या भ्रष्टाचाराच्या चौकशीचे प्रकरण बंद करण्यात आल्याची माहिती समोर आली आहे. ही चौकशी बंद करणे, हा न्यायालय आणि विधीमंडळ यांचा अवमान आहे. त्यामुळे ही चौकशी बंद करण्याचा निर्णय मागे घ्यावा, तसेच मंदिरात भ्रष्टाचार करणार्‍या दोषींवर ‘सी.आय.डी.’च्या अहवालानुसार गुन्हे नोंदवावेत, अशी मागणी हिंदु जनजागृती समितीचे महाराष्ट्र आणि छत्तीसगड राज्य संघटक श्री. सुनील घनवट यांनी मुख्यमंत्री श्री. एकनाथ शिंदे यांच्याकडे एका निवेदनाद्वारे केली.

या वेळी मुख्यमंत्र्यांनी ‘तुळजापूर मंदिर प्रकरणी महाराष्ट्र राज्याच्या मुख्य सचिवांना लक्ष घालण्यास सांगतो’, असे आश्वासन श्री. घनवट यांना दिले. याविषयी हिंदु जनजागृती समितीचे श्री. श्रीकांत पिसोळकर यांनी अमरावती येथील विधान परिषदेतील भाजपचे आमदार तथा माजी राज्यमंत्री श्री. प्रवीण पोटे पाटील आणि नंदुरबार जिल्ह्यातील भाजपचे आमदार डॉ. राजेश पाडवी यांची भेट घेऊन त्यांना निवेदन दिले.

दिलेले निवेदन – 

या वेळी श्री. प्रवीण पोटे पाटील म्हणाले, ‘‘यासंदर्भात मी लक्षवेधी सूचना मांडून सरकारकडून उत्तर मागवीन.’’ डॉ. राजेश पाडवी म्हणाले की, यासंदर्भात मी गृहमंत्री देवेंद्र फडणवीस यांना पत्र लिहून कारवाई करण्याची मागणी करीन.तुळजापूर मंदिर प्रकरणी हिंदु जनजागृती समितीच्या शिष्टमंडळाने अमरावती येथील विधान परिषदेतील भाजपचे आमदार तथा माजी राज्यमंत्री श्री. प्रवीण पोटे पाटील आणि नंदुरबार जिल्ह्यातील भाजपचे आमदार डॉ. राजेश पाडवी, तसेच आमदार श्री. भरतशेठ गोगावले यांना निवेदन दिले.