नावेली येथे भटक्या कुत्र्यांचे ८ वर्षीय मुलीवर आक्रमण

मडगाव – नावेली, मडगाव येथे भटक्या कुत्र्यांनी एका ८ वर्षीय मुलीवर आक्रमण केल्याची घटना घडली असून या आक्रमणात मुलगी गंभीर स्वरूपात घायाळ झाली आहे. ८ कुत्र्यांनी मुलीवर आक्रमण करून २० हून अधिक चावे घेतले असून तिच्यावर रुग्णालयात उपचार चालू आहेत. या घटनेनंतर नागरिकांमध्ये संतापाचे वातावरण निर्माण झाले आहे. नावेलीतील ही मुलगी घराजवळ असलेल्या किराणा दुकानात २ सप्टेंबरला खरेदीसाठी जात होती. ती जात असतांना तिला कुत्र्यांची झुंड दिसल्यावर ती घाबरून पळायला लागली. पळतांना तिचा तोल गेला आणि ती रस्त्यावर पडली. रस्त्यावर पडताच कुत्र्यांनी तिच्यावर आक्रमण केले. हे आक्रमण अचानक झाल्याने घटनास्थळी असलेल्या लोकांना कुत्र्यांच्या आक्रमणापासून तिचे रक्षण करणे शक्य झाले नाही.

राज्यात भटक्या कुत्र्यांची समस्या दिवसेंदिवस वाढत चालली आहे. नावेली परिसरात भटक्या कुत्र्यांची संख्या खूप वाढली असून त्यांचा बंदोबस्त करावा, अशी स्थानिकांकडून मागणी करण्यात येत आहे.