‘ज्येष्ठ पत्रकार सन्मान योजने’तील त्रुटी दूर करण्याचे मुख्यमंत्री देवेंद्र फडणवीस यांचे आश्वासन !

मुंबई – ‘ज्येष्ठ पत्रकार सन्मान योजने’तील त्रुटी दूर करून येत्या १ मासात योजनेची सुधारित नियमावली सिद्ध करावी, असे आदेश मुख्यमंत्री देवेंद्र फडणवीस यांनी प्रशासकीय अधिकार्‍यांना दिले आहेत. याविषयी ९ एप्रिल या दिवशी मंत्रालय आणि विधीमंडळ वार्ताहर संघाच्या सह्याद्री अतिथीगृह येथे मुख्यमंत्र्यांसमवेत बैठक झाली. या बैठकीत पत्रकारांना कॅशलेस उपचार, शिवनेरीतून विनामूल्य प्रवास यांविषयीही प्रस्ताव सादर करण्याची सूचना मुख्यमंत्र्यांनी केली.
या बैठकीला मुख्य सचिव सुजाता सौनिक यांसह गृह विभाग, वित्त विभाग, परिवहन विभाग, गृहनिर्माण विभाग, माहिती आणि जनसंपर्क विभाग, म्हाडा यांचे अधिकारी, तसेच पोलीस महासंचालक रश्मी शुक्ला, राज्य अधिस्वीकृती समितीचे अध्यक्ष यदु जोशी, मंत्रालय आणि विधिमंडळ वार्ताहर संघाचे अध्यक्ष दिलीप सपाटे, उपाध्यक्ष आलोक देशपांडे, सरचिटणीस दीपक भातुसे, खजिनदार विनोद यादव यांसह मंत्रालय आणि विधीमंडळ वार्ताहर संघाच्या कार्यकारिणीचे सदस्य सर्वश्री खंडूराज गायकवाड, मनोज दुबे, सुजित महामूलकर, प्रशांत बारसिंग आणि राजन शेलार उपस्थित होते.

दिलीप सपाटे यांनी प्रारंभी पत्रकारांच्या प्रलंबित प्रश्नांविषयीची माहिती बैठकीत दिली, तसेच योजनांमधील त्रुटी दूर करण्याची मागणी केली. यावर देवेंद्र फडणवीस यांनी सकारात्मक प्रतिसाद दिला.