आता मांसविक्री करणार्‍या दुकानांवर मांस ‘हलाल आहे कि झटका ?’, हे लिहावे लागणार ! – जयपूर महानगरपालिका

जयपूर महानगरपालिकेचा निर्णय

जयपूर (राजस्‍थान) – येथे मांसविक्री करणार्‍या दुकानांतील मांस हे ‘हलाल आहे कि झटका ?’, ते दुकानांवर लिहावे लागणार आहे. जयपूर महानगरपालिकेने मांसविक्री करणार्‍या सर्व दुकानदारांना याविषयीचा आदेश दिला असून लवकरच त्‍याची कार्यवाही (अंमलबजावणी) करण्‍यात येईल, अशी माहिती जयपूरच्‍या महापौर डॉ. सौम्‍या गुर्जर यांनी दिली. शहरात मांसविक्रीचे दुकान चालू करायचे असल्‍यास महानगरपालिकेकडून परवाना घ्‍यावा लागणार असून अशा दुकानदारांना व्‍यावसायिक भूमीवरच मांसाची दुकाने चालू करण्‍याची अनुमती दिली जाणार आहे.

महापौर डॉ. गुर्जर पुढे म्‍हणाल्‍या, ‘‘जनतेच्‍या भावना लक्षात घेऊन हा निर्णय घेण्‍यात आला आहे. जयपूरमध्‍ये १५० प्रभाग आहेत. त्‍यांतील लोकांनी माझ्‍याकडे अनेकदा याविषयी तक्रारी केल्‍या आहेत. मांसाच्‍या दुकानांजवळ कचरा टाकला जात असल्‍याने नागरिकांना मोठ्या प्रमाणात त्रास होत असल्‍याच्‍याही तक्रारी मला प्राप्‍त झाल्‍या आहेत. या संदर्भात नुकतीच आमच्‍या कार्यकारिणीची बैठक होऊन त्‍यात ‘मांसविक्रीची दुकाने निवासी भागांबाहेर असावीत’, असे ठरले. मी स्‍वत: शाकाहारी आहे, दुर्गंधी सहन करू शकत नाही. माझ्‍यासारखी समस्‍या इतरही अनेक नागरिकांचीही असू शकते.’’