श्री स्वामी समर्थ साखर कारखान्याच्या तत्कालीन संचालकांवर गुन्हे नोंद !

सोलापूर जिल्हा बँक फसवणूक प्रकरण

सोलापूर – वर्ष २०१४-१५ दरम्यान सोलापूर जिल्हा मध्यवर्ती सहकारी बँकेकडून साखर तारण ठेवून ६१ कोटी रुपये कर्ज घेतल्यानंतर तारण साखरेची परस्पर विक्री करून बँकेची ४६ कोटी ३७ लाख रुपयांची फसवणूक केल्याप्रकरणी अक्कलकोट तालुक्यातील श्री स्वामी समर्थ सहकारी साखर कारखान्याच्या तत्कालीन संचालक मंडळाविरूद्ध १० वर्षांनी गुन्हा नोंद करण्यात आला आहे. या प्रकरणी कारखान्याचे तत्कालीन अध्यक्ष, भाजपाचे माजी आमदार सिद्रामप्पा पाटील आणि संचालक असलेले उद्धव बाळासाहेब ठाकरे पक्षाचे माजी आमदार शिवशरण पाटील बिराजदार यांच्यासह २४ जणांना आरोपी करण्यात आले आहे.

सोलापूर जिल्हा मध्यवर्ती सहकारी बँकेच्या २३८ कोटींच्या आर्थिक हानीची जबाबदारी निश्चित करून बँकेच्या तत्कालीन संचालक व अधिकार्‍यांसह ३२ जणांविरोधात व्याज व दंडासह नुकसान भरपाई वसूल करण्याची कारवाई चालू झाली असून यात माजी उपमुख्यमंत्री विजयसिंह मोहिते-पाटील व त्यांचे पुत्र भाजपचे आमदार रणजितसिंह मोहिते-पाटील, बार्शीचे उद्धव बाळासाहेब ठाकरे पक्षाचे आमदार दिलीप सोपल, राष्ट्रवादी काँग्रेस पक्षाचे माजी आमदार राजन पाटील-अनगरकर, माढ्याचे माजी आमदार बबनराव शिंदे व त्यांचे बंधू माजी आमदार संजय शिंदे आदींचा समावेश आहे.

माजी आमदार दीपक साळुंखे यांच्यासह २३ जणांवर फसवणुकीचा गुन्हा नोंद !

सांगोला सहकारी साखर कारखान्याची तारण ठेवलेली ११ कोटी ४४ लाख ७६ हजार रुपयांची साखर परस्पर विक्री केल्याप्रकरणी कारखान्याचे तत्कालीन अध्यक्ष, माजी आमदार दीपक साळुंखे, भाजपचे जिल्हाध्यक्ष चेतनसिंह केदार यांच्यासह २३ संचालकांविरूद्ध सोलापूर जिल्हा सहकारी मध्यवर्ती बँकेची फसवणूक केल्याप्रकरणी गुन्हा दाखल करण्यात आला आहे.